O 82% das e dos emprendedores retornados apoiados pola Xunta teñen experiencia no sector no que invisten

A maiores, o 71 por cento dos beneficiados e beneficiadas polas Axudas ao Retorno Emprendedor posúen formación específica na materia na que emprenden.

O impacto dos investimentos en Galicia dos 500 proxectos empresariais postos en marcha grazas ao apoio económico da Xunta foi superior aos 25 millóns de euros.

De 2018 a 2021 a Xunta destinou 3 millóns de euros ao programa de Axudas ao Retorno Emprendedor
De 2018 a 2021 a Xunta destinou 3 millóns de euros ao programa de Axudas ao Retorno Emprendedor
Listen to this page using ReadSpeaker
Santiago de Compostela, 20 de decembro de 2021.

O balance da Estratexia Galicia Retorna destaca que a gran maioría das emprendedoras e emprendedores retornados que solicitaron unha axuda a través da Secretaría Xeral da Emigración para a posta en marcha dunha iniciativa empresarial teñen experiencia no sector no que invisten e formación específica.

A Xunta de Galicia destinou, dende 2018 a 2021, 3 millóns de euros a través das Axudas ao Retorno Emprendedor co obxectivo de facilitar a posta en marcha de 500 iniciativas empresariais de galegas e galegos retornados na comunidade autónoma. 

Estas axudas forman parte das accións específicas da Estratexia Galicia Retorna que puxo en marcha a Secretaría Xeral da Emigración en 2018 e que se prorrogou por mor da covid-19 ao longo do presente 2021.  

Deste xeito, segundo se desprende do balance da Estratexia, o 82% dos galegos e galegas que retornaron a Galicia para poñer en marcha un negocio e contaron cunha axuda ao retorno emprendedor da Xunta teñen experiencia no sector no que invisten, mentres o 71% tamén posúen formación específica na materia na que emprenden. 

O impacto dos investimentos en Galicia destes proxectos, relacionados coa Industria 4.0, o naval, o téxtil, as telecomunicacións ou os servizos, foi superior aos 25 millóns de euros. 

Esta liña de subvencións ten como fin favorecer o retorno á nosa comunidade autónoma das e dos galegos residentes no exterior de xeito que poidan fixar a súa residencia e integrarse social e laboralmente na sociedade, realizando nela as súas actividades empresariais e profesionais, favorecendo así o desenvolvemento do tecido empresarial de Galicia.  

As axudas son de 5.000 euros, aumentables en 1.000 se a beneficiaria é muller e outros 2.000 se se pon en marcha nun concello rural. 

339 lecturas