Miranda viaxa ao Brasil para asinar os distintos convenios de colaboración con entidades sociais do país e reforzar os lazos institucionais
O secretario xeral da Emigración visitará varias das principais cidades brasileiras, como Río de Xaneiro, São Paulo e Santos.
O responsable do departamento autonómico manterá encontros con representantes do Goberno español nas diferentes urbes, así como coa colectividade grazas ás charlas de presentación da Estratexia Retorna 2020.
O secretario xeral da Emigración, Antonio Rodríguez Miranda, emprende hoxe a súa primeira viaxe do ano ao Brasil, onde visitará varias das principais cidades do país e das que contan cunha maior presenza de cidadás e cidadáns galegos. O responsable do departamento autonómico empregará parte deste primeiro desprazamento ata o país suramericano para asinar algúns dos convenios de colaboración que mantén desde hai anos con diferentes entidades de carácter social e orixe galega, como a Casa de España de Rio de Janeiro e a Sociedade de Socorros Mutuos e Beneficiente Rosalía de Castro tanto de São Paulo como a de Santos.
A axenda institucional inclúe, así mesmo, reunións con varias e varios representantes do Goberno español nas diferentes cidades que se visitarán para reforzar os lazos e a estreita cooperación que rexe as relacións diplomáticas que mantén Galicia coa Administración central española no Brasil. Tamén a presentación das diferentes medidas recollidas na Estratexia Retorna 2020 para facilitar o retorno á comunidade autónoma dos galegos e galegas residentes no exterior centrará parte dos encontros coa colectividade que levará a cabo Miranda nas diferentes cidades visitadas.
Preto de 50.000 galegas e galegos
O Brasil é o segundo país do mundo cunha maior presenza de cidadás e cidadáns galegos, con 48.691 residentes, só por detrás da Arxentina, que segue a encabezar a listaxe con máis de 178.000 galegas e galegos, segundo os últimos datos oficiais publicados polo Instituto Nacional de Estadística (INE), con data 1 de xaneiro de 2019. Delas e deles 24.638 proceden da provincia de Pontevedra, 10.860 da Coruña, 11.164 de Ourense e 2.029 de Lugo. Do total cidadás e cidadáns galegos residentes en Brasil só o 23,38 %, é dicir, 11.386 foron nados en Galicia; o resto son descendentes xa nacidas e nacidos no país de destino.
Novas relacionadas