O secretario xeral da Emigración, Antonio Rodríguez Miranda, recibeu esta mañá no aeroporto de Vigo ao grupo de participantes no programa "Conecta co Camiño". Este programa permitirá a 50 galegos do exterior achegarse a Galicia a través da realización do Camiño Portugués pola Costa durante as próximas semanas.

Realizado en colaboración coa Dirección Xeral de Xuventude, o programa permitirá que mozos e mozas galegos do exterior, de entre 18 e 20 anos, procedentes dos países con maior presenza da colectividade galega, poidan percorrer a ruta xacobea entre o 20 e o 31 de xullo.

A iniciativa ten como obxectivo promover os lazos con Galicia e coa súa cultura a través do Camiño de Santiago. As persoas participantes coñecerán a realidade da Galicia actual e moderna, e actuarán como embaixadores destas nos países nos que residen.

O programa desenvolverase a través do percorrido a pé por oito tramos galegos do Camiño de Santiago Portugués pola Costa ata Compostela. As persoas participantes tamén participarán en actividades orientadas a coñecer aspectos da historia xacobea e o patrimonio cultural vinculado á zona.