Miranda recibe ao director executivo da Fundación España Salud de Caracas coa que a Xunta colabora na atención socio sanitaria e domiciliaria a galegas e galegos residentes en Venezuela

A Secretaría Xeral da Emigración acaba de firmar un acordo de colaboración con esta entidade que permitirá destinar 75.000 euros a sufragar os gastos xerados pola prestación de asistencia médica e farmacéutica, así como axuda a domicilio, aos galegos e galegas  residentes neste país de máis de 65 anos que carezan dos medios económicos axeitados. 

Imaxe da reunión celebrada hoxe no despacho do secretario xeral da Emigración na capital de Galicia
Imaxe da reunión celebrada hoxe no despacho do secretario xeral da Emigración na capital de Galicia
Listen to this page using ReadSpeaker
Santiago de Compostela, 6 de xuño de 2022.

O secretario xeral da Emigración, Antonio Rodríguez Miranda, recibiu hoxe a Álvaro Gómez Rodríguez, director executivo da Fundación España Salud de Caracas, con quen analizou a situación das galegas e galegos residentes e as e os seus descendentes en Venezuela.

Rodríguez Miranda recordou que a Secretaría Xeral da Emigración acaba de firmar un acordo de colaboración coa Fundación España Salud que permitirá destinar 75.000 euros a esta organización de cara a axudar na atención das necesidades sanitarias e domiciliaria a galegas e galegos, ou descendentes destes, maiores de 65 anos residentes en Venezuela que necesitan da súa cobertura por razóns de idade, dependencia e falta de recursos.

A Fundación España Salud de Caracas é una entidade sen ánimo de lucro que ten como finalidade prestar atención sanitaria médico-cirúrxica e farmacéutica ás persoas emigrantes españolas beneficiarias, en particular a aquelas que se atopan en situación de precariedade económica. Presta, ademais, o Servizo de Axuda a Domicilio (SAD) para a asistencia a persoas en situación de dependencia para atender as súas necesidades da vida diaria, dando cobertura a máis de 1.800 galegas e galegos. En Venezuela reside unha importante colectividade de persoas de orixe galega que, pola súa situación de carencia, sofren unha falta de mecanismos de cobertura social e sanitaria, agravada polas circunstancias nas que se atopa o país.

A Secretaría Xeral da Emigración leva anos colaborando con esta entidade, xa que considera necesario exercer unha colaboración que permita dar cobertura  sanitaria e social axeitada á colectividade galega residente en Venezuela.

344 lecturas