Miranda ratifica ante as entidades galegas de Montevideo o compromiso da Xunta coa colectividade galega a través do nomeamento da nova delegada da Xunta en Uruguai

O secretario xeral da Emigración e Elvira Domínguez Alonso mantiveron un encontro coas e cos diversos representantes dos centros galegos en Montevideo.

Miranda volveu insistir na necesidade da integración de institucións para adaptarse á realidade social do século XXI.

Imaxe da reunión coas entidades galegas en Montevideo
Imaxe da reunión coas entidades galegas en Montevideo
Listen to this page using ReadSpeaker
Montevideo (Uruguai), 23 de xullo de 2022.

O secretario xeral da Emigración, Antonio Rodríguez Miranda, celebrou en Montevideo unha reunión coas entidades galegas no Uruguai, na que aproveitou para presentar oficialmente á nova delegada da Xunta neste país, Elvira Domínguez Alonso. Deste xeito, ratificou ante a colectividade galega o compromiso da Xunta cos galegos e galegas deste país a través deste nomeamento. 

No encontro estiveron presentes as e os representantes da Federación de Asociacións Gallegas en Uruguay, o Centro Cultural y Recreativo “Alma Gallega”, o Centro Gallego de Montevideo, o Centro Social Bolos Valle Miñor, o Centro Cultural Hijos de Galicia, o Centro Ourensán de Montevideo, o Centro Pontevedrés Social y Deportivo, o Centro Social Bergantiños, Unión Hijos de Morgadanes e o Hogar Español.

Miranda  e Elvira Domínguez analizaron as necesidades actuais da colectividade galega no país suramericano así como o labor que están a desenvolver os distintos centros galegos tanto na promoción do Xacobeo como da cultura e lingua galegas. 

Durante a reunión, Antonio Rodríguez Miranda aproveitou para continuar a solicitar ás entidades a que abran un período de reflexión sobre como avanzar na necesaria integración de institucións para adaptarse á realidade social do século XXI. 

391 lecturas