O secretario xeral da Emigración, Antonio Rodríguez Miranda, acompañado polo delegado da Xunta en Bos Aires, Alejandro López Dobarro, presentou ante representantes dos centros galegos da capital arxentina e membros da colectividade galega o proxecto da nova Delegación da Xunta de Galicia, unha infraestrutura que permitirá reforzar a presenza institucional de Galicia no país e ampliar os servizos á cidadanía. Durante o encontro explicáronse as características da nova sede, situada nunha das principais arterias de Bos Aires, e destacouse que nace coa vocación de converterse na casa de todos os galegos na Arxentina e nun escaparate permanente da Galicia actual.

Na súa intervención, Miranda salientou que a nova Delegación será moito máis ca unha oficina administrativa: será un punto de encontro para a colectividade, un espazo para promover o retorno, a cultura, o turismo, o Camiño de Santiago, o emprendemento e as oportunidades económicas que ofrece Galicia.

Así mesmo, agradeceu o labor desenvolvido durante décadas polos centros galegos na preservación da identidade galega e subliñou que esta nova sede representa tamén unha mostra do agradecemento permanente de Galicia á Arxentina, pola acollida que brindou a milleiros de galegos ao longo da historia, reforzando os lazos de irmandade entre ambas as dúas terras.