O secretario xeral da Emigración, Antonio Rodríguez Miranda, visitou o Centro Galego de Rosario, onde mantivo un encontro coa directiva da entidade e con membros da colectividade galega asentada nesta cidade arxentina. Durante a visita estivo acompañado polo delegado da Xunta de Galicia en Arxentina, Alejandro López Dobarro, nunha xornada que permitiu coñecer de primeira man a actividade cultural e social que desenvolve esta institución histórica da diáspora.

No encontro, Miranda agradeceu o labor das persoas que ao longo das décadas mantiveron vivo o espírito galego en Rosario, destacando o papel fundamental que desempeñan os centros galegos como espazos de encontro, preservación das tradicións e transmisión da cultura ás novas xeracións. O secretario xeral reiterou ademais o compromiso da Xunta de Galicia de seguir apoiando ás entidades da colectividade para que continúen sendo referentes de galeguidade no exterior e pontes permanentes de unión con Galicia.