O secretario xeral da Emigración, Antonio Rodríguez Miranda, participou no encontro do Centro Recreativo União do Río Tea, situado no municipio de Lauro de Freitas, nas proximidades de Salvador de Bahía, onde foi recibido polo seu presidente, Fabricio Pérez, socios e directivos. Durante o encontro, Miranda destacou o compromiso desta entidade coa preservación da cultura galega e co mantemento dos vínculos culturais entre Galicia e Brasil, sinalando que “o Río Tea é un símbolo da amizade e da unión entre xeracións de galegos que, dende hai máis de cincuenta anos, manteñen viva a nosa cultura a milleiros de quilómetros da casa”.

Fundado en 1974 por galegos orixinarios principalmente de Ponteareas e Ponte Caldelas, o Centro Recreativo União do Río Tea converteuse co paso dos anos nun espazo esencial para a colectividade galega asentada no estado de Bahía. As súas amplas instalacións acollen cada ano actividades culturais, festivas e recreativas que fortalecen o sentimento de pertenza e a transmisión das tradicións galegas ás novas xeracións.

Miranda agradeceu o traballo continuado da directiva e dos socios desta institución, e reafirmou o compromiso da Xunta de Galicia de seguir apoiando ás entidades do exterior que, como o Centro Recreativo União do Río Tea, manteñen vivo o espírito da emigración galega e serven de ponte entre Galicia e a súa diáspora en Brasil.