O secretario xeral da Emigración, Antonio Rodríguez Miranda, participou en Caracas (Venezuela) na entrega de premios dun campionato de fútbol sala infantil e xuvenil no que participaron máis de 300 nenos galegos entre os 10 e os 17 anos. Este evento deportivo, que reuniu á comunidade galega, subliña o compromiso continuo da Xunta con fomentar a participación da mocidade en actividades que promovan valores positivos e o sentimento de pertenza á súa terra de orixe. “Este campionato en Venezuela foi un claro exemplo deses valores en acción, celebrando a unión e a identidade galega a través do deporte”.

Miranda destacou a importancia do deporte na colectividade galega, afirmando que "o deporte xoga un papel fundamental na colectividade, non tanto polos seus méritos físicos como polos valores que transmite. O compañeirismo, a fraternidade, o esforzo, o traballo e a honestidade son algunhas das virtudes que lograron que os galegos foran queridos e respectados alá onde foran e que escribiran historias de éxito como as que atopamos todos os días en cada recuncho do mundo".