O secretario xeral da Emigración, Antonio Rodríguez Miranda, participou este venres no acto de celebración do 75º aniversario do emblemático programa radiofónico “Sempre en Galicia”, o mais lonxevo de todo o mundo de emisión radiofónica en galego e referente da cultura galega na diáspora uruguaia desde a súa creación. Un programa que tamén se escoita ó outro lado do Río da Prata.

O evento, celebrado no Auditorio Vaz Ferreira de Montevideo, congregou a numeroso público vinculado á colectividade galega, ademais de autoridades locais e personalidades do ámbito cultural.

Durante o acto no que estivo acompañado pola delegada de Xunta en Uruguai, Elvira Domínguez, Miranda subliñou o valor simbólico do programa como “voz permanente de Galicia no exterior e ponte de unión entre xeracións de emigrantes”. Agradeceu tamén a labor das persoas que mantiveron viva esta audición ao longo de sete décadas e media, mantendo o galego e a cultura como sinais de resistencia cultural.