Miranda insta á unidade de acción de tódolos colectivos de Salvador de Baía que actúan no ámbito da galeguidade
O responsable autonómico na materia recibiu no seu despacho ao presidente do Clube Espanhol da cidade brasileira, formado fundamentalmente por galegas e galegos.
O secretario xeral da Emigración, Antonio Rodríguez Miranda, recibiu no seu despacho ao presidente do Centro Espanhol de Salvador de Baía, Humberto Campos Peso, con quen falou da actualidade brasileira e máis concretamente sobre o presente e perspectivas das colectividades galega e española na cidade.
Tras dar repaso á situación das entidades que traballan no ámbito da colectividade, Rodríguez Miranda transmitiu a Campos Peso a súa firme convicción da necesidade da confluencia de actuacións entre as institucións que traballan nese ámbito, para reforzar a súa presenza e garantir as mellores condicións para encarar o futuro e dotalas dos mellores servizos posibles, en beneficio dos asociados e asociadas.
A mensaxe foi plenamente compartida por Campos Peso, quen se comprometeu a traballar nese camiño e a seguir mantendo contacto regular coas autoridades da Xunta de Galicia, coa finalidade de dotar á institución que preside das ferramentas óptimas para cumprir os obxectivos sociais do Centro Espanhol.
O Centro
Fundado en 1911, a súa finalidade era a de estreitar vínculos entre a colonia galega e a sociedade baiana. Foi a primeira institución de carácter social con que contaban os galegos e galegas na cidade, e algúns comerciantes de éxito comezaron a frecuentar as súas instalacións. En 1929 fusiónase co Ibérico Sport-Club, e xa en 1975 foi inaugurada a nova sede, situada fronte ao mar nunha contorna de elevado valor paisaxístico, que está a ser reformada na actualidade, e que conta con espazos deportivos, de lecer, amplas instalacións de hostalaría, escola de danza, academia de ximnasia, etcétera, que a converten nun referente da vida cultural e social en Baía.
Arestora, e segundo os datos do INE a 1 de xaneiro de 2015, residen no conxunto da República Federativa do Brasil un total de 46.217 cidadás e cidadáns galegos, de quen 32.745 (máis do setenta por cento) naceron xa no país de acollida, e son por tanto galegas e galegos de segunda ou terceira xeración.
Novas relacionadas