O secretario xeral da Emigración, Antonio Rodríguez Miranda, fixo balance en Montevideo das políticas de apoio ao retorno aplicadas pola Xunta de Galicia, subliñando o notable incremento das axudas concedidas ás familias galegas procedentes de Uruguai durante o ano 2025. Salientou que as axudas extraordinarias ao retorno chegaron xa a 63 beneficiarios, cun investimento total de 168.050 euros, a cifra máis alta desde 2018. 

Ademais, as axudas ao autoemprego permitiron apoiar 10 novos proxectos emprendedores, cun importe concedido de 76.000 euros, o que converte este ano nun dos de maior dinamismo emprendedor da diáspora galega no país. No ámbito educativo, 33 mozos e mozas de Uruguai obtiveron unha bolsa BEME en 2025, cun investimento de 296.500 euros.

Miranda destacou que estas cifras consolidan o papel de Uruguai como un dos países de referencia no retorno galego e puxo en valor o labor da Oficina Integral de Asesoramento e Seguimento ao Retorno, que desde a súa posta en marcha atendeu 1.447 consultas de persoas procedentes deste país. 

O secretario xeral subliñou que a Xunta continuará reforzando estas políticas, que “permiten recuperar talento, apoiar proxectos de vida e fortalecer a conexión de Galicia coa súa diáspora”.