Miranda analiza con Xuntanza de Cataluña os proxectos culturais máis relevantes que esta agrupación realizará ao longo deste ano

Imaxe da reunión celebrada hoxe na sede da SXE na capital de Galicia
Imaxe da reunión celebrada hoxe na sede da SXE na capital de Galicia
Listen to this page using ReadSpeaker
Santiago de Compostela, 9 de maio de 2022.

O secretario xeral da Emigración, Antonio Rodríguez Miranda, mantivo hoxe unha reunión cos membros de Xuntanza de Asociacións Galegas en Cataluña, na que tamén estivo presente a subdirectora de Relacións coas Comunidades Galegas, Isabel Martínez Pellicer. Neste encontro analizáronse os proxectos culturais que esta agrupación, que aglutina a diversos centros galegos de Cataluña, realizará ao longo do presente ano de cara a potenciar a cultura e tradicións galegas.

No encontro estiveron presentes o presidente de Xuntanza, Xosé Carlos García, a presidenta da Agrupación Cultural Agarimos de Badalona, Amelia Espinos, o presidente da Asociación Cultural Rosalía de Castro de Cornellá, Oliver Fernández, e o presidente da Casa Galega de L´Hospitalet, Manuel Prados. Esta entidade é froito dun proceso de unión de varios centros galegos desta comunidade autónoma asinado en 2013 en Barcelona. Entre outros, celebran o certame de Poesía Rosalía de Castro, o Día da Dona en Cornellá, o Día das Letras Galegas ou a Mostra de teatro galego e a Mostra gastronómica, a maiores de editar tres revistas na actualidade. 

165 lecturas