O secretario xeral da Emigración, Antonio Rodríguez Miranda, asistiu onte ao 71º aniversario do Centro Gallego de Mar del Plata, felicitando aos seus socios e socias e simpatizantes polo traballo realizado ao longo de todos estes anos en prol da colectividade galega nesta cidade arxentina. No acto, no que Rodríguez Miranda asinou no libro de honra da institución, estiveron tamén presentes o intendente de Mar del Plata, Guillermo Montenegro, e o delegado da Xunta na Arxentina, Alejandro López Dobarro.

Este centro fundouse o 1 de xullo de 1952. Durante o acto institucional interpretáronse os himnos de España, Arxentina e Galicia. A festa contou, ademais de cun xantar de confraternidade, con actuacións conxuntas das agrupacións da institución, así como de todas as colectividades españolas afincadas en Mar del Plata e na súa contorna.