A Secretaría Xeral da Emigración dará prioridade neste mandato ao retorno de emigrantes, tanto de primeira como de segunda xeración, con bolsas específicas que se poñerán en marcha en 2017 e buscarán captar á mocidade no exterior que estea mellor formada.

Por tanto, en consonancia con este compromiso, informou este departamento nun comunicado, convén destacar a posta en marcha, coa estreita colaboración da Consellería de Cultura, Educación e Ordenación Universitaria, das "Bolsas de Excelencia para a Mocidade no Exterior", dotadas inicialmente con medio millón de euros, e que supoñen a principal novidade nos orzamentos da Secretaría Xeral da Emigración.

Esta nova actuación pretende captar para Galicia o talento máis brillante de entre os mozos e mozas residentes fóra, fomentando o retorno da poboación activa laboral e contribuíndo a fixar novas e novos residentes no territorio.

A oferta centrarase "en estudos con capacidade de absorción no tecido produtivo e laboral galego, con especial atención aos relacionados co sector primario", segundo destacou na súa presentación o secretario xeral da Presidencia, Manuel Galdo, e co orzamento previsto preténdense cubrir os gastos de desprazamento, matrícula, aloxamento e mantemento dos beneficiarios e beneficiarias.

Entre as finalidades que perseguen estas bolsas atópase garantir a súa permanencia no territorio, unha vez finalicen os seus estudos, mediante un itinerario personalizado para a súa inserción laboral en empresas galegas.

Esta é a principal novidade nuns orzamentos da Secretaría Xeral da Emigración que incrementan este ano un 5,38% a súa contía xeral, un 5,87% se se considera o orzamento efectivo (cantidade total menos Capítulo I de Persoal).

Así, para este 2017 o departamento que dirixe Antonio Rodríguez Miranda conta con 8.775.873 euros, o que supón un incremento neto de 447.073 respecto do presente ano.

Toda a subida de orzamento -e mesmo 23.000 euros máis- é absorbida pola nova medida de impulso ao retorno. Así, as principais liñas de actuación e programas mantéñense intactos ou con moi lixeiras variacións.

En primeiro lugar, e pola súa relevancia orzamentaria, Emigración blindará, como en anos recentes, as axudas económicas individuais a emigrantes galegas e galegos (destinadas a paliar situacións de alta precariedade en países con escasa ou nula protección social e/ou sanitaria), cuxo investimento ascende aos dous millóns de euros. Soamente por esta acción, unhas 8.000 familias galegas no Exterior en serias dificultades poden paliar, cada ano, a súa situación de necesidade.

Por outra banda, manteñen o seu orzamento e obxectivos outros programas específicos de carácter socioasistencial, ben dirixidos a persoas maiores -como Reencontros na Casa ou Reencontros na Terra- ou especialmente á mocidade na diáspora -Escolas Abertas, obradoiros de formación, xornadas de especialización, Conecta con Galicia ou Aventúrate en Galicia.

Ademais da medida innovadora deste ano, as citadas Bolsas de Excelencia para a Mocidade no Exterior, Emigración mellora as liñas de impulso ao retorno xa consolidadas en exercicios anteriores, tanto para as e os emprendedores, como para aquelas e aqueles que necesitan un acompañamento urxente.

Así, as axudas de autoemprego e creación de empresas por parte de persoas emigrantes retornadas, que nos seus tres anos de vida impulsaron a posta en marcha de medio cento de negocios, manteñen o seu orzamento en 2017. Estas subvencións, cunha contía máxima que pode chegar a 8.000 euros por proxecto, complementan sen excluílas as axudas doutros departamentos autonómicos, e doutras administracións, para autónomas e autónomos e persoas emprendedoras. O obxectivo é aproveitar os coñecementos e experiencia dos galegos e as galegas no Exterior, e tamén facilitar o seu retorno á terra natal.

Igualmente, increméntase un 33% o investimento nas axudas extraordinarias a persoas emigrantes galegas, destinadas a facer fronte a aquelas causas sobrevindas derivadas do retorno e que requiren dunha atención perentoria. Emigración resolve cada petición individualmente, de maneira que as e os beneficiarios non teñen que esperar ao final da convocatoria para percibir a axuda. No últimos catro anos, orzáronse para estas situacións que demandan atención urxente máis de 550.000 euros.

Emigración reforzará así mesmo en 2017 o seu apoio ás Comunidades Galegas do Exterior, en cumprimento do papel que lle outorga o Estatuto de Autonomía de Galicia, e que se desenvolveu na Lei de Galeguidade.

Na atención aos colectivos que representan á diáspora galega fóra do territorio destaca tamén o investimento social e sanitario, destinada a garantir unhas condicións de vida dignas aos galegos e galegas en situación de maior desvantaxe, sexa por razóns de idade, económicas, ou de saúde. É preciso lembrar que estas entidades prestan servizos sociais e sanitarios en países con coberturas moi limitadas ou inexistentes nesta materia.

Así, consolídase a aposta na axuda fundamental para garantir esa atención; para a convocatoria de subvencións en réxime de concorrencia competitiva para gastos de funcionamento e para proxectos de actuación dirixidos ao cumprimento dos fins culturais, sociais, de mocidade e formativas das comunidades galegas destinaranse este ano 1.655.870 euros. Xa no ano 2016 experimentara un incremento de 11,11 puntos porcentuais.

Por outra banda, tamén se consolida, ata os 613.000 euros, a dotación orzamentaria para axudas á conservación, obras, equipamentos e infraestrutura de instalacións, e para a mellora de dotacións e equipamentos de carácter inventariable.

Tanto no primeiro como no segundo dos casos, o secretario xeral de Emigración, Antonio Rodríguez Miranda, remarcou que mediante estas liñas de apoio ás comunidades, a Xunta axuda a que a actividade das mesmas "poida redundar directamente na promoción da nosa cultura, pero sobre todo na atención aos galegos do Exterior, especialmente no campo social e sanitario, máxima prioridade do Goberno galego". "Así se demostrou nos peores anos dunha crise que xa parece remontar, e nesa liña manterémonos no futuro", expresou.

Fonte: Finanzas.com

• Arquivo coa noticia en La Región (picar aquí para descargar)