España é o primeiro país de Europa de tránsito de mulleres vítimas de trata e o terceiro do mundo en consumo de prostitución. Un 32,1% dos homes españois recoñecen consumir sexo de pago e ao redor do 90% da prostitución consumida en Galicia está controlada por mafias. Estes son algúns dos datos que reflicten a dimensión dun negocio do que se alerta á comunidade internacional coa celebración o 18 de outubro do Día europeo contra a trata de seres humanos, mediante a campaña Corazón Azul, promovida pola ONU.

A Secretaría Xeral da Igualdade conmemora esta data coa edición de material divulgativo composto por 3.000 carteis, que se distribúen en todos os campus universitarios, nos Centros de Información á Muller, CIM, e nos servizos sociais dos concellos e nas 9 ONGs coas que colabora Igualdade para a atención a mulleres vítimas de trata; así como 10.000 posavasos, que se distribúen nos locais de hostalaría, en virtude do convenio asinado a pasada semana entre Igualdade e a CEG.

A campaña Corazón Azul simboliza o drama das vítimas e a insensibilidade das persoas que compran e venden seres humanos e quere ser un icono internacional da loita contra a trata. Ten como obxectivo loitar contra a trata de persoas, mediante accións que promovan unha participación masiva e unha maior sensibilización social e solidariedade coas vítimas de trata. As persoas interesadas poden adherirse á campaña a través de facebook ou contactando con calquera das entidades especializadas na atención ás mulleres vítimas de explotación sexual e colaboradoras da campaña en Galicia, que son a Asociación Faraxa, a Asociación da Comisión Católica Española de Migración (ACCEM), Médicos do Mundo, Cáritas de Santiago e de Ourense, Adoratrices de Ourense, Asociación Ecos do Sur e Relixiosas Oblatas de Ferrol.