Igualdade amplia o presuposto para axudar este ano a 25 novas vítimas de violencia de xenéro, con pagamentos únicos de 7.000 euros

A ampliación da dotación presupostaria, publicada no DOG de onte, ascende a 175.000 euros e supón duplicar o orzamento inicial deste exercicio para esta medida, ata completar un total de 350.000 euros.

Esta liña compleméntase coa de pagos mensuais, que no que vai de ano perciben 158 mulleres.

Listen to this page using ReadSpeaker

O Diario Oficial de Galicia publicou onte unha ampliación de 175.000 euros da dotación presupostaria para a liña de axudas de pagamento único da Secretaría Xeral da Igualdade, dirixida a vítimas de violencia de xénero. Con este presuposto ampliado crece un 100% a contía disponible inicialmente para este ano, que era doutros175.000 euros, ata completar un orzamento total de 350.000 euros.

Igualdade solicitou esta ampliación orzamentaria ante a insuficiencia do presuposto inicial para atender o volume de solicitudes presentadas. Ata o de agora, no que vai de ano foron resoltas favorablemente as solicitudes de 24 mulleres, delas 11 da provincia de Pontevedra, 8 da Coruña, 4 de Lugo e 1 de Ourense. A partida da ampliación vai permitir resolver favorablemente a solicitude doutras 25 mulleres, o que dará un total de 49 mulleres que se van beneficiar en 2011 da axuda de pagamento único.

Estas axudas teñen una contía media de 7.000 euros e están dirixidas a mulleres vítimas de violencia de xénero residentes en Galicia, que acrediten insuficiencia de recursos e unhas especiais dificultades para obter un emprego e carezan de rendas que, en cómputo mensual, superen o 75% do salario mínimo interprofesional.

Amais desta liña de pagamento único, Igualdade ten establecida outra liña de pagos mensuais para vítimas de violencia de xénero, que no que vai de ano están a percibir un total de 158 mulleres -68 da provincia de Pontevedra, 48 da Coruña, 23 de Ourense e 19 de Lugo- con contías mensuais que oscilan entre os 300 e os 800 euros, durante un ano.

932 lecturas