Feijóo valora o interese máximo do Goberno cubano por coñecer a economía galega e concretar distintos proxectos e actividades de negocio entre Galicia e Cuba

O titular da Xunta reuniuse na tarde de onte xoves co vicepresidente do Consello de Ministros, Ricardo Cabrisas, e asinou co Ministerio de Cultura un memorando para consolidar os lazos históricos e culturais existentes entre o pobo galego e o pobo cubano.

Agradece ao vicepresidente Cabrisas o seu ofrecemento para coordinar co resto dos ministerios as posibilidades de negocio e a concreción de investimento de compra e de venda.

No eido cultural, subliña que a sinatura do memorando permitirá “concretar distintas actividades de operadores culturais, de información e de traslado de distintas experiencias no ámbito artístico e audiovisual, entre Cuba e Galicia”.

O responsable autonómico proseguiu a xornada de traballo que concluíu cunha cea cos varios viceministros do Goberno cubano, á que tamén asistiu Ricardo Cabrisas.

A axenda económica do presidente da Xunta complementouse coas reunións que o conselleiro de Economía, Emprego e Industria, Francisco Conde, mantivo co viceministro da Enerxía e co viceministro da Construción.

  • Alberto Núñez Feijóo mantivo unha xuntaza co vicepresidente do Consello de Ministros de Cuba, Ricardo Cabrisas
    Alberto Núñez Feijóo mantivo unha xuntaza co vicepresidente do Consello de Ministros de Cuba, Ricardo Cabrisas
  • Alberto Núñez Feijóo mantivo unha xuntaza co vicepresidente do Consello de Ministros de Cuba, Ricardo Cabrisas
    Alberto Núñez Feijóo mantivo unha xuntaza co vicepresidente do Consello de Ministros de Cuba, Ricardo Cabrisas
  • Sinatura do Memorando de entendemento entre o Ministerio de Cultura da República de Cuba e a Xunta
    Sinatura do Memorando de entendemento entre o Ministerio de Cultura da República de Cuba e a Xunta
  • O presidente da Xunta asiste á ofrenda floral ante o monumento a José Martí
    O presidente da Xunta asiste á ofrenda floral ante o monumento a José Martí
Listen to this page using ReadSpeaker
A Habana (Cuba), 27 de maio de 2016.

O presidente da Xunta, Alberto Núñez Feijóo, valorou, tras unha reunión onte xoves co vicepresidente do Consello de Ministros, Ricardo Cabrisas, o interese máximo do Goberno cubano por coñecer a economía galega e concretar distintos proxectos e actividades de negocio entre Galicia e Cuba. “Mantivemos unha reunión longa co vicepresidente Ricardo Cabrisas, un dos vicepresidentes máis importantes do Goberno cubano en relación coa apertura económica que está iniciando o país”, aseverou, ao que engadiu que o encontro serviu para facer un repaso pormenorizado de todos os sectores produtivos onde Galicia está exportando e avaliar, así, a posibilidade de que estas exportacións se poidan dirixir tamén a Cuba.

Durante a xuntanza, Feijóo trasladou a Cabrisas as capacidades dos sectores produtivos galegos: do sector agroalimentario, tanto no cárnico como no lácteo; do sector madeireiro; no ámbito da biomasa; no eido das TIC e da biotecnoloxía; e tamén as capacidades no ámbito das infraestruturas e da construción.

Nesta liña, o titular do Goberno galego agradeceu ao vicepresidente o seu ofrecemento para coordinar co resto dos ministerios as posibilidades de negocio e a concreción de investimento de compra e de venda. Non en van, Ricardo Cabrisas foi o encargado de asinar co ministro Luis de Guindos a condonación parcial e o establecemento da débeda de Cuba con respecto ao Estado español.

Ao longo do encontro, Feijóo referiuse tamén aos datos das exportacións en Galicia, “xa que os máis de 18.000 millóns de euros en exportacións –aseverou- son, sen dúbida, unha tarxeta de presentación dunha economía aberta, dunha economía que sabe vender e producir a prezo competitivo e con calidade contrastada”.

Sinatura dun memorando co ministerio de Cultura cubano
Na xornada de onte, o presidente da Xunta asinou tamén co Ministerio de Cultura de Cuba un memorando para consolidar os lazos históricos e culturais existentes entre o pobo galego e o pobo cubano.

“Estamos a falar, en definitiva, dun memorando para concretar distintas actividades de operadores culturais, de información e de traslado de distintas experiencias no ámbito artístico e audiovisual, entre Cuba e Galicia”, explicou, subliñando que entre as posibilidades que contempla o documento atópanse a cooperación, o intercambio e a capacitación de expertos, así como a catalogación e conservación do patrimonio material e inmaterial das comunidades galegas.

Cunha vixencia de catro anos, o documento prevé ademais a organización de exposicións de arte e a promoción e comercialización de obras de artistas cubanos e galegos como outras iniciativas que se desenvolverán en beneficio de ambas as dúas culturas.

Nesta liña, cómpre salientar que no prazo máximo dun mes, Cuba e Galicia reuniranse novamente para explorar todas as opcións que ofrece este novo marco de colaboración, e concretar as propostas que se levarán a cabo nas próximas datas.

Se ben os vínculos de afectividade e apego existentes entre ambos os dous pobos son sólidos e consistentes, este documento constata tamén que a construción de Galicia como nacionalidade histórica é froito, en gran parte, da actividade das comunidades galegas en Cuba, ao tempo que estas tamén foron parte da construción da nación cubana.

Este memorando pon de manifesto a relación privilexiada entre as institucións autonómicas e o Goberno cubano, e nun momento no que a illa está vivindo un proceso de actualización no que Galicia quere estar moi presente.

Tras a sinatura do documento, o responsable autonómico proseguiu a xornada de traballo que concluíu cunha cea con varios viceministros do Goberno cubano, á que tamén asistiu Ricardo Cabrisas. Unha axenda que se complementou coas reunións que mantivo o conselleiro de Economía, Emprego e Industria, Francisco Conde, co viceministro da Enerxía e co viceministro da Construción.

En imaxes
776 lecturas