Feijóo agradece a Raúl Castro a cordialidade do pobo cubano e confirma o interese por concretar colaboracións en sectores como o agroalimentario, biotecnolóxico, enerxético e o das TIC

O titular da Xunta reúnese por segunda vez co presidente da República de Cuba. 

Ambos os dous mandatarios acordan asinar, entre a Xunta, a vicepresidencia económica e nove ministerios cubanos, un memorando que xa está en redacción para concretar as actividades económicas que se poden levar a cabo entre Cuba e Galicia. 

O titular da Xunta agradece que Galicia puidese utilizar o antigo Centro Galego da Habana para a xuntanza institucional histórica de todos os centros galegos, un lugar histórico e simbólico para a emigración. 

O titular da Xunta, que concluíu a súa visita á illa asistindo á presentación do espectáculo ‘Son galego, Son cubano’; cualifica a súa segunda viaxe institucional á illa de “punto e seguido” nas relacións bilaterais entre Cuba e Galicia. 

Incide en que este momento de apertura de Cuba ao resto do mundo “é un momento que Galicia non pode perder”; “un momento histórico no que Galicia ten que volver a estar presente en Cuba con intensidade e onde Galicia pode representar ao conxunto de España e pode ser a porta de apertura de Cuba a Europa”, di.

  • O titular da Xunta reúnese por segunda vez co presidente da República de Cuba
    O titular da Xunta reúnese por segunda vez co presidente da República de Cuba
  • O titular da Xunta reúnese por segunda vez co presidente da República de Cuba
    O titular da Xunta reúnese por segunda vez co presidente da República de Cuba
  • O titular da Xunta reúnese por segunda vez co presidente da República de Cuba
    O titular da Xunta reúnese por segunda vez co presidente da República de Cuba
Listen to this page using ReadSpeaker
A Habana (Cuba), 29 de maio de 2016.

O titular da Xunta de Galicia, Alberto Núñez Feijóo, agradeceu onte ao presidente da República de Cuba, Raúl Castro, a cordialidade do pobo cubano e confirmou o interese do país por concretar colaboracións en sectores como o agroalimentario, o biotecnolóxico, o enerxético e o das TIC. “Agradecer ao presidente Raúl Castro a deferencia que tivo de volver a recibirnos e de poder ter unha longa reunión durante a cal falamos da evolución de Cuba e do novo momento político que está vivindo a illa, das relacións entre Cuba e Estados Unidos e, por suposto, de Galicia”, aseverou.

Nesta liña, Feijóo valorou moi positivamente o feito de que o presidente de Cuba coñecese o contido das reunión mantidas nesta viaxe con 10 ministerios do seu goberno, así como co vicepresidente do Consello de Ministros, Ricardo Cabrisas, e coa Cámara de Comercio de Cuba; e o interese por concretar distintas actividades económicas que se poden levar a cabo entre o pobo cubano e o galego.

“Dicía o presidente Raúl Castro que agora que se abre un novo período de entendemento e de cooperación entre España e Cuba –unha vez que se concretou a forma de saldar a débeda que Cuba tiña con España-, o lóxico é empezar facendo negocios con Galicia. E, eu espero que sexa así”, explicou o titular da Xunta.

Nesta liña, Feijóo precisou que ambos os dous mandatarios acordaron asinar, entre a Xunta, a vicepresidencia económica e nove ministerios cubanos, un memorando que xa está en redacción para concretar as actividades económicas que se poden levar a cabo entre Cuba e Galicia. Actividades no eido agroalimentario –“concretamente no referido á experiencia cooperativa en Galicia”-; no sector da biotecnoloxía; en materia enerxética e no sector das TIC, así como noutro tipo de actuacións relacionadas co transporte, o turismo ou as empresas de contract.

“En definitiva, foi unha xuntanza longa, na que tiven ocasión de agradecer a cordialidade de que puidésemos utilizar o antigo Centro Galego da Habana para a xuntanza institucional histórica de todos os centros galegos. E, onde tivemos tamén ocasión de concretar unha axenda económica que cremos pode marcar unhas relacións bilaterais entre Cuba e Galicia”, aseverou.

‘Son galego, Son cubano’, un espectáculo “único”
Logo da reunión co presidente da República de Cuba, o titular da Xunta asistiu á presentación do espectáculo ‘Son galego, Son cubano’ do artista galego Roi Casal, coa participación especial de Pablo Milanés e Nando Casal en homenaxe ao escritor Xosé Neira Vilas. Un espectáculo no que se escoitaron as letras de Neira Vilas da man de músicos dun lado e outro do Atlántico –Roi e Nando Casal por parte de Galicia e Pablo Milanés polo lado cubano-.

“Asistimos a un espectáculo único, que mestura o son galego e o son cubano, no lugar máis importante de Cuba para os galegos como é o antigo Centro Galego da Habana”, dixo, destacando a maxia do son e do ritmo “que pon de manifesto que, a pesar da distancia xeográfica, somos dúas terras que nos entendemos e fusionamos ben”.

Unha viaxe de “punto e seguido” nas relacións bilaterais entre Cuba e Galicia
Coa asistencia á este espectáculo, o titular da Xunta concluíu a súa visita a illa; unha viaxe que cualificou de “punto e seguido” nas relacións bilaterais entre Cuba e Galicia.

“Foi unha viaxe plena, desde o punto de vista institucional, porque celebramos o XI Consello de Comunidades Galegas, nun lugar histórico e simbólico para a emigración, como é o Centro Galego da Habana, actual Teatro Nacional. E, tamén desde o punto económico, porque tivemos ocasión de manter reunións ao máis alto nivel co Goberno cubano”, sentenciou.

Nesta liña, Feijóo fixo fincapé en que este momento de apertura de Cuba ao resto do mundo “é un momento que Galicia non pode perder”; “un momento histórico no que Galicia ten que volver a estar presente en Cuba con intensidade e onde Galicia pode representar ao conxunto de España e pode ser a porta de apertura de Cuba a Europa”. “E ímonos cunha axenda económica aberta... En definitiva, foi unha viaxe completa na que constatamos que Cuba quere seguir tendo contacto con Galicia, quere tratar con Galicia para, a partir de aí, seguir tratando con España”,concluíu.

En imaxes
1262 lecturas