O presidente en funcións da Xunta, Alberto Núñez Feijóo, referiuse onte ás e aos premiados Gallegos del Año, como unha representación dos galegos e as galegas que nunca se renden, que din que non ao conformismo e que conciben Galicia como un país aberto e dinámico. “Nos premiados desta noite está personificada a Galicia que queremos. Unha Galicia en pé, unida e solidaria que loita coas ferramentas da razón e do traballo. Unha Galicia que non se rendeu nunca, e que non se renderá xamais”, asegurou.

Deste xeito, Feijóo referiuse, nun primeiro termo, ao canónigo Salvador Domato, sentinela do arquivo histórico diocesano de Santiago; e a Verónica Boquete, “unha das mellores xogadoras do fútbol feminino español”. “E desde que o hospital La Rosaleda botara a andar da man, entre outros do doutor Fernández Albor, -engadiu- non houbo un día de rendición. E nese traballo continúa Rafael Silva. E tampouco hai lugar para o desmaio nas investigacións de Xosé Ramón García Bustelo”.

Así mesmo, o presidente do Goberno galego afirmou que aínda que o mar do Orzán levou as súas vidas, nunca levará a lembranza de Rodrigo Maseda, Javier López e José Antonio Villamor, “que tampouco se renderon”. E referiuse, tamén, ao exemplo de perseveranza e constancia de María Castro Gigirey: “Ela –dixo- non se rende, igual que Mabel Loza, que explora novos medicamentos para a esquizofrenia, a artrose e a dor”.

Da gaiteira e pianista Cristina Pato, subliñou que “non deixa que se renda a súa arte, e vai na procura de novos sons que interpreten a nosa terra”, logo de salientar que “nin o Deportivo nin o Celta, nin o Celta nin o Deportivo se renderon á desgraza de estar nunha división que non era a súa”.

“Eduardo Pardo de Guevara está situado na división de honor, con esa responsabilidade de coordinador do CSIC en Galicia. E non habería medallas para David Cal, Begoña Fernández, Tamara Echegoyen, Sofia Toro, Javier Gómez Noya, Chano Rodriguez, Juan Antonio Saavedra e José Enrique Porto, se houbera pasado pola súa cabeza a rendición. Eles son cabeza e corazón de Galicia”, engadiu.

No tocante ao premiado Jesús Alonso, Feijóo salientou que Galicia é o que é porque galegos coma el dixeron que non ao conformismo. “Nunha ocasión, Jesús Alonso fixo unha definición do galego. ‘Traballador, aforrador e seri’. Don Jesús estábase definindo a si mesmo. Cántas veces oiría o noso Galego do Ano expresións como non ‘vale a pena’, ‘para que te vas meter nesto’, ‘confórmate coa empresa que tes’. Supoño que serían moitas. Pero el sempre dixo que adiante”.

Ao longo da súa intervención, o presidente do Goberno galego afirmou que “somos produto de mulleres e homes que non se renderon”. “Seu é ese modelo de Galicia que estamos afianzando entre todos” dixo, ao que engadiu que “o pobo que superou as grandes tormentas que a historia rexistra, atravesa outra e faino co mesmo espírito dos galegos de onte e de antonte: unindo e non separando, mirando a España como algo noso no que queremos estar, no que queremos convivir e que queremos mellorar; vendo na Europa que contribuímos a formar co Camiño de Santiago, a casa común dunha civilización próspera e libre; observando o mundo coa confianza dos que seguimos tendo a Galicia como unha ‘célula de universalidade’”.

Fotos: El Correo Gallego