Feijóo ofrece ao presidente electo de Uruguai o saber facer das empresas galegas en sectores clave para o país como as renovables e as infraestruturas

Recorda que ambos territorios xa están a colaborar en sectores como o enerxético, no que o país uruguaio está a facer unha forte aposta polas enerxías eólica, a fotovoltaica e a biomasa.

Salienta que Galicia tamén está a colaborar en materia de infraestruturas, a través do plan de investimentos, presentado polo presidente Tabaré Vázquez en 2016, en Santiago.

Resalta que o investimento anunciado polo Goberno uruguaio en 2018 en materia de estradas pode xerar necesidades de importación de maquinaria e equipos de construción.

Ambos mandatarios avaliaron tamén as oportunidades en sectores como as TIC ou a automoción.

Valora o compromiso de Lacalle de visitar Galicia durante o Xacobeo 2021.

O presidente da Xunta agradeceu a Tabaré Vázquez ter trasladado ao institucional os lazos históricos que unen a galegos e uruguaios e propón a Lacalle incrementar a colaboración aproveitando novas oportunidades comerciais.

  • O presidente da Xunta de Galicia, Alberto Núñez Feijóo, co presidente electo do Uruguai, Luis Lacalle Pou
    O presidente da Xunta de Galicia, Alberto Núñez Feijóo, co presidente electo do Uruguai, Luis Lacalle Pou
  • O presidente da Xunta de Galicia, Alberto Núñez Feijóo, co presidente saínte do Uruguai, Tabaré Vázquez
    O presidente da Xunta de Galicia, Alberto Núñez Feijóo, co presidente saínte do Uruguai, Tabaré Vázquez
Listen to this page using ReadSpeaker
Montevideo (O Uruguai), 31 de xaneiro de 2020.

O titular do Goberno galego, Alberto Núñez Feijóo, mantivo hoxe unha reunión co presidente electo de Uruguai, Luis Lacalle Pou, a quen lle trasladou o saber facer das empresas galegas en sectores clave para o país como as renovables e as infraestruturas.

Durante a xuntanza, Feijóo tivo a oportunidade de abordar a situación das frutíferas relacións entre Galicia e Uruguai e constatar que esta relación de amizade e de colaboración leal vaise manter no futuro; unha cuestión de grande importancia tendo en conta que son 40.000 as galegas e os galegos que viven no país.

Ao respecto, Feijóo recordou que ambos territorios xa están a colaborar en sectores como o enerxético, no que o país latinoamericano está a facer unha forte aposta polas enerxías renovables, especialmente no eido da eólica, a fotovoltaica e a biomasa. E no sector das infraestruturas, a través do plan de investimentos, presentado polo presidente Tabaré Vázquez en 2016, en Santiago de Compostela.

Sobre este punto, tivo unha mención especial para as estradas, xa que o investimento anunciado polo Goberno uruguaio en 2018 pode xerar necesidades de importación de maquinaria e equipos de construción; e para o sector ferroviario, que está a vivir un relanzamento tras os investimentos do goberno.

Outro dos sectores avaliados na xuntanza foi o das TIC, para o que o Goberno de Uruguai outorga vantaxes fiscais ás empresas que desenvolvan cadeas de valor TIC; así como o de subministración de bens de equipo tradicionais.

O responsable do Executivo autonómico destacou que as exportacións de Galicia a este país latinoamericano ascenderon a preto de 21 millóns de euros e aumentaron case un 2%, unha cifra que pon de manifesto o interese das empresas galegas polo mercado uruguaio.

En concreto, son as exportacións do sector da automoción as que se consolidaron como o principal produto exportado nos últimos anos, seguidas de máquinas e aparatos mecánicos, mercadorías subministradas a buques, peixes e moluscos, prendas de vestir e conservas. Todos eles produtos con alto valor engadido.

Feijóo e Lacalle abordaron tamén as oportunidades de investimento na Comunidade. Non en van, as exportacións de Uruguai a España ascenderon a 103 millóns de euros en 2018, mentres que as importacións aumentaron ata os 158 millóns.

Logo de subliñar que Galicia conta cunha normativa que favorece o investimento nacional, pero tamén o internacional, cunha Lei de implantación empresarial, que ofrece facilidades para acceder a solo empresarial e vantaxes administrativas e fiscais, o presidente galego incidiu noutras potencialidades existentes entre os dous territorios en sectores como o agroalimentario; o farmacéutico; o forestal, que representa o 4% do PIB de Uruguai e conta con beneficios tributarios á explotación forestal, o que pode supoñer un revulsivo para determinadas empresas galegas; e o naval, un sector no que xa existen importantes precedentes de colaboración.

“Constatamos que en todos estes sectores existe unha grande oferta de calidade de empresas galegas”, dixo, referíndose tamén á colaboración entre a Asociación de Empresarios Galegos en Uruguai e a Confederación de empresarios de Galicia e de Pontevedra, a Universidade de Santiago de Compostela e Abanca.

Por último, Feijóo aproveitou o encontro para invitar ao presidente e a todo o país a visitar Galicia e desfrutar do Xacobeo 2021, “do mellor Xacobeo da mellor Galicia”. Unha invitación que foi aceptada por Lacalle, quen se comprometeu a visitar a Comunidade nese Ano Santo.

Feijóo e o presidente electo avaliaron as moitas oportunidades que supón o país, que conta cunha balanza comercial positiva e cunha economía razoablemente saneada. “Estamos a falar tamén dunha excelente porta de entrada de América Latina en Europa e de Europa en América Latina; dun país aberto ao mundo que mantén relacións comerciais privilexiadas coa UE e con Estados Unidos; e que conta cunha lexislación que favorece o investimento nacional e internacional e, sobre todo, que quere seguir crecendo”, dixo o titular da Xunta, facendo fincapé en que tanto Galicia como Uruguai achegan seriedade, estabilidade e certezas.

Encontro co presidente saínte
O responsable do Goberno galego mantivo tamén esta mañá un encontro co presidente saínte, Tabaré Vázquez, a quen agradeceu a cordialidade que sempre estivo presente nas reunións que ambos mantiveron, tanto neste país como en Galicia; así como a súa sensibilidade coa diáspora galega, trasladando ao plano institucional e económico os lazos sociais que unen desde hai décadas a Galicia e Uruguai.

714 lecturas