A Secretaría Xeral da Emigración recorda que este venres, día 22, péchase a convocatoria do programa “Reencontros co Xacobeo”. Cun total de 205 prazas, a iniciativa está destinada a persoas maiores de 65 anos vinculadas ás entidades galegas do exterior para realizar o Camiño de Santiago durante unha semana no mes de outubro deste ano.

Esta programa ten como obxectivo promover os lazos das persoas vinculadas ás entidades galegas con Galicia e coa súa cultura a través do Camiño de Santiago que existen tanto no resto das comunidades autónomas, como nos países europeos. Este ano vólvese abrir a convocatoria tamén aos centros galegos de América.

Deste xeito, unha vez vivida a experiencia, as e os participantes poden colaborar como axentes activos na promoción e difusión do Camiño de Santiago e do fenómeno do Ano Santo Xacobeo nos lugares nos que os centros teñen a súa sede.

Esta iniciativa oferta 205 prazas desenvolvéndose, previsiblemente, na primeira quincena de outubro. Consiste en realizar pequenas etapas do Camiño de Santiago e un achegamento ao patrimonio cultural e natural das respectivas zonas visitadas.

Este programa, que conta cunha dilatada traxectoria, desenvolveuse o ano pasado e o actual centrados no Ano Santo de cara a promocionar o Xacobeo sen perder o espírito de reencontro con Galicia co que naceu esta iniciativa fai máis de 30 anos. 

Máis información nesta ligazón.