O secretario xeral da Emigración, Antonio Rodríguez Miranda, destacou os case 3 millóns de euros destinados en 2022 ás entidades galegas no exterior e que tiveron como fin facer fronte aos gastos de funcionamento, actividades, infraestruturas e equipamentos.

En concreto, destináronse a gastos de funcionamento, proxectos culturais e accións especiais, 1,5M€, xunto a outros 533.000 para reformas e equipamentos e 876.000 máis destinados a acordos de colaboración con entidades sociais que asisten aos nosos galegos e galegas no exterior. 

Moitas das actividades desenvolvidas ao longo do 2022 por parte dos centros galegos do exterior tiveron o Xacobeo como eixe central, co obxectivo de potenciar e promocionar o Camiño de Santiago entre os seus socios e socias, así como a poboación xeral dos seus países de residencia.  

A Xunta de Galicia continuará no 2023 traballando para manter a colaboración con estas entidades, en especial co obxectivo de fomentar a programación cultural, social e formativa das e dos nosos galegos no exterior, así como para axudar nas obras, reforma, habilitación e conservación das instalacións e do patrimonio cultural.