Galicia é a primeira Comunidade Autónoma de España en contar cun convenio de colaboración coa Unión Europea que permita dar asistencia sanitaria aos funcionarios e ás funcionarias da Comisión Europea que viven ou traballan nela. Con este fin, a Conselleira de Sanidade, Rocío Mosquera Álvarez; e o xefe da Oficina Central do Seguro de Enfermidade e de Accidentes da Comisión Europea, Giuseppe Scognamiglio, asinaron hoxe o correspondente documento no que se recolle o procedemento de acceso á prestación de asistencia sanitaria do persoal afiliado ao réxime común de seguro de enfermidade da Comisión Europea que opte por recibila a través do Sergas.

Así, estas persoas poderán contar con cobertura en Atención Primara e Especializada coas mesmas características que as e os galegos; e disporán de tarxeta sanitaria do Servizo Galego de Saúde na que se incluirá a identificación UE que acreditará o seu dereito á asistencia.

Ata o momento, para estas e estes cidadáns non había estandarización da asistencia e non podían acudir á Atención Primaria. Neste sentido, a CE solicitou que os seus funcionarios e as súas funcionarias sexan atendidas nos centros sanitarios públicos de Galicia de maneira planificada e a demanda dos mesmos para garantir a accesibilidade e a continuidade dos coidados.

A asistencia sanitaria destes traballadores e traballadoras será sufragada pola UE de acordo ás tarifas oficiais do Sergas; e o convenio será aplicado non só ás e aos funcionarios en activo, senón tamén a aqueles xubilados e aquelas xubiladas que decidan residir en Galicia. A formalización deste acordo mediante a sinatura de hoxe entre Rocío Mosquera e Giuseppe Scognamiglio permite dotar de estabilidade e garantía de asistencia sanitaria ás e aos traballadores da UE, ao tempo que se axiliza a tramitación burocrática, de forma que os procedementos de pago se realizarán de maneira directa.

Galicia e a Unión Europea apostan así por un marco de axilización dos trámites administrativos nun contexto de igualdade de acceso e de trato. O convenio permite, igualmente, o afianzamento e a estabilidade das institucións da UE na Comunidade Autónoma.