No día de hoxe chegan a Santiago os primeiros participantes do programa "Reencontros na Terra 2010", unha iniciativa organizada pola Secretaría Xeral da Emigración e desenvolvida en colaboración coa Secretaría Xeral de Familia e Benestar, que pretende favorecer o achegamento á terra a aqueles emigrantes galegos e ás súas familias que teñan máis de 60 anos de idade. O programa pretende que estes emigrantes poidan redescubrir as súas orixes e poñerse e contacto coa realidade actual do seu país de orixe a través de distintas actividades encamiñadas a posibilitar o coñecemento da Galicia actual, o encontro coas súas propias familias e o intercambio de experiencias co resto dos participantes.

Ao longo do día de hoxe chegarán a Galicia os 132 primeiros participantes nesta iniciativa, procedentes de Arxentina, Brasil, Cuba e Uruguai. A primeira hora desta mañá xa chegaron ao aeroporto de Lavacolla as primeiras 60 persoas que participan en Reencontros na terra, procedentes da Arxentina. Arredor das 13,00 horas, está previsto que cheguen 11 persoas procedentes de Brasil e outras 52 procedentes de Uruguai. Xa pola tarde, arredor das 17,00 horas aterrarán en Lavacolla os 9 participantes procedentes de Cuba.

En total, neste programa de Reencontros na Terra 2010 participarán 190 persoas procedentes de Arxentina, Brasil, Cuba e Uruguai, entre os 132 que chegan hoxe e os 58 que o farán nunha segunda quenda que terá lugar o 15 de novembro.

Os 190 participantes no programa pertencen a 87 concellos galegos: 36 da provincia da Coruña, 14 de Lugo, 16 de Ourense e 21 da provincia de Pontevedra. Atendendo aos concellos de nacemento dos beneficiarios, destacan os de Malpica, Santiago, A Coruña, Ames, Cee, Ordes e Ribeira, na provincia da Coruña; Chantada, Lugo, Meira e Monterroso, da provincia de Lugo; Barbadás e Bande, da provincia de Ourense; e Gondomar, Vigo, Valga, Rodeiro e Cambados, da provincia de Pontevedra.

Estancia de tres meses
O programa Reencontros na terra desenvolverase ao longo de tres meses e consta de dúas fases direfenciadas. Na primeira delas, de dúas semanas de duración, os participantes estarán aloxados nunha residencia de tempo libre onde participarán en distintas actividades recreativas e culturais, así como excursións a lugares de interese da comunidade co obxectivo de proporcionarlles un maior coñecemento da súa terra de orixe. A segunda fase será a estadía cos seus familiares de Galicia ata completar un tempo máximo de tres meses.