O conselleiro de Emprego, Comercio e Emigración, José González, acompañado polo secretario xeral da Emigración, Antonio Rodríguez Miranda, mantivo hoxe en Madrid un encontro de traballo co secretario xeral de Universidades, Francisco García, no que insistiu na necesidade de establecer unha vía específica e áxil —coordinada entre a Xunta, as universidades públicas e o Ministerio— que permita acelerar o proceso de recoñecemento das titulacións universitarias das persoas beneficiarias das Bolsas Excelencia Mocidade Exterior (BEME) co gallo de garantir o seu acceso a traballos acordes á súa formación. Nesa liña, González urxiu un calendario para a implantación e revisión deste procedemento aliñado coas recomendacións europeas, a creación dunha unidade de coordinación coa Xunta para casos prioritarios ou a participación das universidades galegas nun piloto nacional de avaliación áxil. 

No marco do encontro, o conselleiro apuntou que a Xunta ten deseñada unha folla de ruta para sumar talento como complemento á forza laboral interna coa que xa conta Galicia, pero que non pode desenvolvela por completo sen a implicación do Goberno central en cuestións que son da súa competencia. Recordando a carta enviada en outubro —en coordinación coa Consellería de Educación e coas tres universidades públicas galegas— e que onte mesmo se aprobou en Consello a convocatoria de 2026 con 250 novas bolsas BEME por 2,55 M€, González avogou por reducir burocracia, por unificar criterios e por garantir seguridade xurídica, en liña coas recomendacións da UE que instan aos Estados membros a axilizar o recoñecemento de cualificacións profesionais estranxeiras como vía para favorecer a integración laboral, a mobilidade e a competitividade económica.

Sinalando que a homologación chega a demorarse ata cinco anos, o titular de Emprego fixo fincapé en que un 80 % dos bolseiros BEME quedan en Galicia coa vontade de traballar pero non sempre poden facelo polos atrancos burocráticos. A vía áxil non só os beneficiaria a eles, en todo caso, senón que —recalcou— tamén podería empregala calquera persoa residente en Galicia que precise homologación para exercer, tendo en conta a alta demanda de perfís cualificados en sectores clave como o tecnolóxico, o sanitario, o educativo, os servizos sociais ou a investigación.

Proposta de Galicia

Así, na xuntanza de hoxe o conselleiro demandou unha mesa técnica permanente entre Ministerio, comunidades autónomas e universidades, criterios públicos e unificados para a aceleración de expedientes e un seguimento trimestral dos avances acordados. No marco da vía específica para titulados BEME, urxiu un calendario para revisar e actualizar o sistema de homologación, a creación dunha unidade de coordinación coa Xunta para casos prioritarios (eidos da sanidade, a educación ou a tecnoloxía) e a participación das universidades galegas nun piloto nacional de avaliación áxil.

Neste contexto, solicitou a celebración dunha nova xuntanza de traballo entre a Xunta — xunto cos reitores das tres universidades públicas galegas— e a ministra de Ciencia, Innovación e Universidades, co fin de avanzar de forma conxunta no deseño e posta en marcha de solucións eficaces para esta cuestión que considera prioritaria. Todo co obxecto de acadar —dixo— un acordo para presentar á UE un modelo español de recoñecemento de cualificacións de boas prácticas.

O representante autonómico aproveitou a reunión para lembrar outras cuestións pendentes co Goberno central no que respecta á atracción, retención e aproveitamento do talento do exterior: o traspaso das competencias das autorizacións iniciais de traballo no referido ás persoas traballadoras procedentes de terceiros países, a actualización do catálogo de postos de difícil cobertura e o recoñecemento das microcredenciais como ferramenta clave para a inserción sociolaboral das persoas migrantes.