O presidente da Xunta, Alfonso Rueda, puxo en valor hoxe a contribución de toda a emigración, e nomeadamente de empresarios como Olegario Vázquez Raña, á hora de transformar a Galicia nunha terra moderna e con oportunidades para emprender e traballar. “A nova Galicia é un territorio fértil para emprender, traballar e triunfar grazas a esa xente que saíu cando todo estaba máis difícil”, apuntou.

Así o sinalou esta mañá durante a entrega do Premio Ourensanía 2024 a este empresario mexicano, con orixes en Avión e que durante todo este tempo mantivo o contacto con Galicia. “Olegario é un home de mundo que nunca esqueceu as súas raíces; un home Incansable, valente, con valores familiares e gran deportista”, afirmou Rueda, en referencia isto último aos “enormes éxitos” que colleitou na disciplina de tiro olímpico.

O titular do Executivo galego valorou como a emigración galega axudou a construír Galicia desde o exterior, ao tempo que tamén se integraban nas súas sociedades de acollida. “El e tantos outros desa Galicia emigrada nos enviaron dende onde estaban traballando duramente a mensaxe que necesitabamos: ‘se nós puidemos nunha terra que nos era estraña ao principio, todo o mundo pode”, subliñou. Neste sentido, puxo en valor o “carácter aberto” da galeguidade que axudou a establecer comunidades fortes e que “busca por enriba de todo a unión”.