O secretario xeral da Emigración, Antonio Rodríguez Miranda, visitou a socias, socios e instalacións da Hermandad Gallega de Venezuela en Caracas, coa que asinou dous acordos de colaboración coa entidade, un para atención das necesidades socio sanitarias e asistenciais básicas das cidadás e dos cidadáns galegos residentes na capital e a súa contorna, e máis outro para o mantemento dunha oficina de información e asesoramento á colectividade galega.

O primeiro deles, para atención socio sanitaria e asistencial e dotado con 30.000 euros, ten por obxecto a atención do colectivo de persoas galegas residentes alí que por razóns de idade, estado físico e situación de carencia necesiten a cobertura de necesidades asistenciais e sanitarias. O segundo posibilita o co financiamento dos gastos de funcionamento da Oficina de Información da Hermandad Gallega na súa propia sede, e que ten por finalidade a realización de actividades de información, difusión e asesoramento á colectividade galega de programas e actuacións desenvolvidos a prol dos galegos e galegas residentes no exterior.

Miranda visitou de maneira previa á sinatura, e precisamente, o Centro de Día no que a Hermandad presta boa parte da asistencia social e sanitaria máis relevante ao colectivo de galegas e galegos en Venezuela. Tamén antes da sinatura dos convenios tivo ocasión de manter unha xuntanza de traballo cos directivos e directivas das entidades galegas con presenza na cidade: a Asociación Civil Galega Fillos de Ourense, a Benéfica Fillos de Lalín, o Centro Benéfico Fillos da Estrada, a Asociación Benéfica Provincia de Pontevedra, a Asociación Benéfica Fillos da Coruña, Fundaourense, a Asociación Fillos da Provincia de Lugo, e maila Asociación Terras de Celanova e Baixa Limia.

Entrega das ‘compostelas’
O secretario xeral mantivo un encontro directo con socias e socios da Hermandad, onde presentou ademais un adianto das ‘Bolsas Excelencia Mocidade Exterior’, iniciativa pioneira que neste ano se porá en marcha, e que ten por obxecto facilitar que as e os galegos e descendentes, residentes no estranxeiro e cun bo expediente académico, poidan realizar mestrados nalgunha das tres universidades galegas, o cal lles dea acceso ao mercado laboral galego.

Tamén presentou as outras dúas liñas de apoio ao retorno, as axudas asistenciais -para gastos sobrevidos do retorno en casos de emerxencia- e as Axudas ao Retorno Emprendedor: estas pódense sumar a outras subvencións públicas e privadas, e ata o de agora teñen axudado a medio centenar de iniciativas empresariais desenvolvidas por persoas retornadas a se implantaren no territorio galego. Cómpre destacar que, en ambos casos, a porcentaxe de beneficiarios e beneficiarias que residían en Venezuela antes do retorno é a maior de entre tódolos países.

Finalmente, Miranda presidiu a entrega das compostelas (credenciais de teren realizado un tramo mínimo do Camiño de Santiago) aos mozos e mozas participantes no programa Conecta con Galicia 2016 e que residen en Caracas.

Permanente atención
Miranda recordou aos galegos e galegas de Caracas a “permanente atención que a Xunta presta ás necesidades do nosos paisanos residentes en Venezuela”, e comprometeuse a redobrar esforzos no caso de que estas necesidades aumenten no futuro. Neste senso, cómpre lembrar que a axuda que o Goberno galego pon ao dispor das cidadás e dos cidadáns residentes en Venezuela desenvólvese en dous eixos fundamentais.

Por unha banda, nas achegas directas a través de axudas individuais, que teñen beneficiado a duascentas familias só en 2016; e, por outra, a través de programas específicos para a mocidade e maiores, acordos en materia social e asistencial con entidades que actúan alí, e acollida en institucións de coidado a galegos: aténdese directamente a uns 1.000 galegos e galegas en colaboración coas diferentes institucións. O orzamento destinado en 2016 para Venezuela a estas liñas ascendeu a máis de 600.000 euros.

O social, a prioridade
A Hermandad Gallega de Venezuela en Caracas é unha das institucións máis importantes da diáspora, e un referente de intensa actividade social, económica e cultural que a Galeguidade desenvolve nas sociedades de recepción. A entidade aglutina agora mesmo a preto de 12.000 familias galegas, e as súas instalacións son moi valoradas polo seu ambiente de seguridade no centro da convulsa capital venezolana.

Ademais de numerosas agrupacións musicais e culturais, deportivas e sociais, a Hermandad desenvolve actividades de todo tipo para a diáspora, como as xa comentadas nos ámbitos socio sanitario e asistencial, “aos que neste tempo debemos prestar especial atención e dar prioridade, pois o máis importante é sempre atender a quen máis o necesita”, segundo recalcou Miranda ás e aos directivos das entidades galegas en Caracas.

A Hermandad nace da fusión do Lar Galego, da Casa de Galicia e Centro Galego, e na súa sede principal ten instalados os servizos socio asistenciais, con consultorios de distintas especialidades médicas. Ademais, fúndase en 1965 o Colexio Castelao, dependente da Hermandad, e que está integrado arestora por case 500 alumnas e alumnos e medio centenar de educadores. Desde o ano 2006, a Hermandad é membro da Comisión Delegada do Consello das Comunidades Galegas, máximo órgano de representación da diáspora galega no mundo.

Remate da viaxe
Xa hoxe venres, Miranda visitará precisamente o Colexio Castelao e asinará un novo acordo de colaboración para a atención a paisanas e paisanos en materia social, sanitaria e asistencial, nesta ocasión coa Fundación España Salud. Tamén visitará o Fogar San José, que atende a un destacado número de galegos e galegas na capital venezolana.

Con estas actividades, Miranda remata esta nova viaxe a Venezuela, país no que residen 46.095 galegas e galegos, de quen 29.684 (un 64’4 por cento) naceron xa na diáspora. Coa súa permanente e crecente atención ás colectividades galegas que residen alí, a Xunta quere transmitir aos paisanos e paisanas residentes no país a súa preocupación compartida pola complicada situación que atravesa o país.