O presidente da Xunta de Galicia, Alberto Núñez Feijóo, destacou hoxe o extraordinario labor de AEGAMA nos seus 25 anos de historia como lugar de encontro das emprendedoras e os emprendedores galegos en Madrid. Así o manifestou no acto de conmemoración do aniversario desta asociación de empresarias e  empresarios.

O presidente do Goberno galego puxo en valor o espírito co que naceu a asociación de unión e axuda mutua que a levou a ser unha referencia no asociacionismo empresarial na capital. “Os galegos foron quen de manter a galeguidade á vez que se integraban nas sociedades de acollida” apuntou.

Neste senso, Feijóo estableceu un paralelismo entre as dificultades que experimentaron as galegas e os galegos emigrados e os difíciles condicionantes históricos e económicos aos que se ten enfrontado nos últimos anos o Goberno galego, “sempre desde a previsibilidade, o rigor, a prudencia, a eficiencia e a deostada austeridade”.

Con respecto a isto, o titular da Xunta destacou que afortunadamente esta situación se está a reverter na actualidade e que hoxe xa podemos falar de creación de emprego, presupostos á alza, diminución de impostos e recuperación de retribucións das e dos empregados públicos.

Comunidades cumpridoras
Ademais, Feijóo lembrou que Galicia e Madrid poden presentarse como comunidades cumpridoras cos seus provedores e capaces de controlar o recurso da débeda pública. “Sabemos que é o momento de impulsar medidas que favorezan a consolidación dun marco favorable á creación de riqueza e emprego” e así se recolle no Plan estratéxico Galicia 2015-2020 da Xunta, que servirá de guía para a definición dun modelo de crecemento baseado na innovación, na internacionalización e o emprendemento, así como para o desenvolvemento dunhas políticas sociais que resulten sostibles.

Finalmente, o presidente da Xunta sinalou que a Asociación de Empresarios Galegos en Madrid é un exemplo neste sentido xa que “soubo aproveitar os momentos de dificultade para seguir unidos e compartir experiencias e, entre todos, buscar solucións aos problemas para saír do ciclo con máis fortalezas e capacidade de crecemento”.