O Diario Oficial de Galicia vén de publicar a convocatoria das subvencións, en réxime de concorrencia competitiva, para a execución de proxectos e de microproxectos de cooperación ao desenvolvemento no exterior promovidos polos axentes de cooperación durante o ano 2014.

Poderán presentarse a esta convocatoria proxectos e microproxectos no exterior executados polas Organizacións Non Gobernamentais para o Desenvolvemento (ONGD), así como os proxectos no exterior executados por outros axentes de cooperación, como universidades, empresas e organizacións empresariais, sindicatos e ás comunidades galegas no exterior.

As solicitudes poderán presentarse na Dirección Xeral de Relacións Exteriores e coa UE ata o vindeiro 30 de xuño. A valoración das solicitudes estará ao cargo dunha comisión avaliadora formada polo director xeral de Relacións Exteriores e coa UE, en calidade de presidente, e tres persoas funcionarias deste departamento, que actuarán como secretario e vogais.

Os requisitos que deben reunir as entidades solicitantes son, entre outros, estar inscritas no Rexistro Galego de Axentes de Cooperación para o desenvolvemento –con polo menos un ano de antelación á convocatoria-; formar parte do Sistema Universitario de Galicia, no caso das universidades; ter xustificadas as axudas recibidas para as anualidades 2011 e anteriores por parte da Xunta de Galicia a outros proxectos de cooperación; e ter sede, domicilio social ou delegación permanente en Galicia, agás as comunidades no exterior.

Pola súa banda, os requisitos que se lle esixen aos proxectos son non estar iniciados con anterioridade ao 1 de xaneiro de 2014 e finalizar antes do 31 de decembro de 2014; identificar contrapartes ou socios locais que participen responsablemente na execución; non substituír ao Estado na prestación de servizos públicos de saúde, educación regulada ou investigación oficial; redundar na ampliación das capacidades e as liberdades das poboacións beneficiarias; repercutir práctica e cuantificablemente na satisfacción das necesidades básicas da poboación das zonas máis desfavorecidas do país beneficiario; e que o proxecto se axuste tanto á realidade como á capacidade de xestión da entidade solicitante e da súa contraparte.

A dotación orzamentaria destas axudas é de 1.680.000 euros, que se reparte en 1.300.000 euros para proxectos no exterior de ONGD, 300.000 euros en proxectos no exterior doutros axentes de cooperación e 80.000 euros máis para os microproxectos no exterior promovidos polas ONGD.

A Xunta de Galicia poderá financiar ata un 95 por cento do orzamento total do proxecto, non sendo en ningún caso a subvención concedida superior aos 70.000 de euros ou aos 100.000 nos proxectos presentados por agrupación de entidades; no caso dos microproxectos a subvención concedida non pode ser superior a 20.000 euros. A valoración das solicitudes comprenderá a análise da entidade solicitante, o socio local, o contido do proxecto e a súa coincidencia coa estratexia da Cooperación Galega.

Esta convocatoria de axudas enmárcanse no III Plan Director da Cooperación Galega 2014-2017, aprobado polo Consello da Xunta e polo Parlamento de Galicia; así como no Plan Anual da Cooperación Galega para o 2014.
 

• Convocatoria no D.O.G. (picar aquí para descargar)