O secretario xeral da Emigración, Antonio Rodríguez Miranda, clausurou a súa viaxe a Cuba cun encontro cos coordinadores e coordinadoras das distintas provincias, a quen describiu como “pezas fundamentais” do labor que está a levar a cabo desde hai décadas o Goberno galego no país centroamericano. A colaboración na distribución das axudas económicas individuais que outorga o departamento autonómico permite cada ano a máis de 7.000 familias galegas residentes na illa paliar as súas necesidades máis urxentes.

O responsable de Emigración da Xunta de Galicia non quixo deixar pasar a ocasión de transmitir os seus parabéns a todas e todos os colaboradores repartidos polas distintas zonas xeográficas do país polo seu traballo. Máis de dúas terceiras partes das axudas individuais que cada ano se conceden a cidadás e cidadáns galegos sen recursos de Cuba seguindo os criterios estipulados nas bases da orde autonómica residen fóra da capital, o que dificulta a súa entrega.

Xestionar a distribución
Precisamente para realizar estes labores desprazáronse ata o país centroamericano traballadores da Secretaría Xeral da Emigración. Alí encárganse de xestionar directamente o proceso de distribución das axudas ás familias galegas beneficiarias e de controlar que o procedemento se realice de acordo ás bases.