Máis de 1.000 alumnos e alumnas participaron este ano nos 42 obradoiros da Secretaría Xeral da Emigración nas comunidades galegas
O departamento que dirixe Antonio Rodríguez Miranda destinou este ano máis de 240.000 euros para accións formativas, e no entorno dos 600.000 para o conxunto de iniciativas enfocadas fundamentalmente á mocidade.
Esta liña de actuación reforza o pulo que o Goberno galego quere dar ao relevo xeracional nas comunidades galegas espalladas por todo o mundo.
- Clausura do obradoiro de pandeireta e canto celebrado na Sociedade Galega Sementeira de Basilea
- Clausura do obradoiro de pandeireta e canto celebrado na Sociedade Galega Sementeira de Basilea
- Imaxe dun dos obradoiros celebrados en México no Centro Galego da capital azteca na segunda quincena do mes de novembro, impartido polo profesor Alexandre Fernández Castro
- Imaxe dun dos obradoiros celebrados en México no Centro Galego da capital azteca na segunda quincena do mes de novembro, impartido polo profesor Alexandre Fernández Castro
A Secretaría Xeral da Emigración, que dirixe Antonio Rodríguez Miranda, realizou en colaboración coas comunidades galegas un total de 42 obradoiros de folclore e artesanía (modalidades de percusión, pandeireta e canto, baile, gaita, e encaixe de palillos), e de cociña galega, impartidos a través das propias colectividades galegas da diáspora, dos que se teñen beneficiado directamente algo máis dun milleiro de alumnas e alumnos.
Tendo en conta o efecto multiplicador destas accións –por canto o alumnado directo é despois o encargado de espallar estas técnicas e coñecementos entre as e os receptores finais, que son as e os galegos residentes fóra da Galicia territorial-, pódese dicir que decenas de milleiros de persoas se benefician cada ano das accións formativas desenvolvidas por Emigración.
Co orzamento deste ano 2014, a Secretaría Xeral ten destinado para axudas ás Comunidades Galegas encamiñadas a accións formativas especializadas (xornadas, grupos folclóricos, programas de actividades propios de carácter xuvenil, equipamentos) na contorna dos 150.000 euros, aos que cómpre engadir 95.000 para seminarios, xornadas de especialización, e congresos de xuventude galega no Exterior.
Esta liña de actuación compleméntase con outras destinadas á mocidade, tales como o programa ‘Conecta con Galicia’ (para rapazas e rapaces de entre 14 e 18 anos nunha das modalidades, e de 18 a 20 noutra), ‘Campos de Traballo’ (para xoves de entre 20 e 30 anos) ou ‘Escolas Abertas’ nas que, se ben participan persoas de tódalas idades, rexistran un moi maioritario número de rapaces e rapazas menores de 25 anos. A estas accións, no seu conxunto, téñense destinado máis de 350.000 euros.
Por todo o mundo
As accións formativas financiadas por Emigración lévanse a cabo no último terzo do ano, en función da dispoñibilidade do profesorado que imparte e recibe os cursos, e tamén da idoneidade da quincena que dura a formación no país no que se asenta a comunidade galega correspondente. Así, aínda se están a desenvolver os dous cursos finais dos previstos na actual anualidade.
Do total de 42 obradoiros en 2014, e incluíndo os activos arestora, celebráronse 5 de percusión, 5 de pandeireta e canto, 13 de baile galego, 9 de gaita, e 1 de encaixe de palillos, dos correspondentes aos de folclore e artesanía, máis outros 9 da especialidade de cociña galega.
Por lugar de realización, 22 deles impartíronse en América: 6 en Arxentina (nas cidades de Bos Aires –tres-, Mar del Plata, Comodoro Ribadavia e Río Gallegos); 1 en Perú (na cidade de Jesús María – Lima); 5 en Brasil (Río de Xaneiro, Río Vermelho, Santos, Niteroi e Salvador); 2 en Cuba (ambos na Habana); 4 en Venezuela (Caracas, Valencia, Lechería e Maracaibo); 1 en Uruguai (Montevideo); 1 en México (na capital); e os 2 últimos en Chile (Santiago e Viña del Mar).
Outros 7 celebráronse na Europa Central, 4 deles en Suíza (Xenebra, Laussanne, Münchestein, e Basilea) e 3 en Alemaña (Cuxhaven, Frankfurt e Bonn). E, finalmente, os 13 restantes en comunidades autónomas españolas distintas á galega: 6 no País Vasco, 2 en Castela e León, e cadanseu en Navarra, Madrid, Cataluña, Comunidade Valenciana e Illas Canarias.
30 alumnos e alumnas de media
Aínda que a media de asistencia de alumnas e alumnos por curso é de 30, algúns superan esta cifra pola alta demanda existente, pero nunca ata o punto de que a calidade formativa poida resentirse. Así, dos celebrados este ano 2014, o de maior afluencia foi o obradoiro de percusión impartido na segunda quincena de novembro en México D.F., a cargo do profesor Alexandre Fernández Castro e organizado do Centro Galego da capital azteca.
Cómpre salientar a alta capacitación técnica e nivel de compromiso de todo o profesorado dos obradoiros, que contan con ampla experiencia na actividade formativa e, sobre todo, no campo profesional da materia obxecto do curso. Tamén convén destacar que as especialidades nas que a Secretaría Xeral da Emigración colabora son aquelas que sinala precisamente o alumnado a través das comunidades galegas ás que está adscrito.
Novas relacionadas