A delegada da Xunta de Galicia en Uruguai, Elvira Domínguez, participou na cerimonia de entrega de trofeos da Liga Española de Deportes de Uruguai, celebrada nas instalacións do Centro Alma Gallega en Montevideo, onde esta institución resultou proclamada campiona da edición 2025. Domínguez puxo en valor o papel desta entidade e do conxunto da colectividade galega no desenvolvemento deportivo e cultural, salientando que a presenza galega no exterior non só se sostén en actividades culturais, senón tamén en iniciativas deportivas que fomentan o encontro, a participación e a identidade.

Durante o acto, destacou que este tipo de eventos contribúen a reforzar os lazos que unen Galicia e a diáspora, ao tempo que se revaloriza o traballo das entidades galegas no mundo. Ademais, felicitou ao Centro Alma Gallega polo título conseguido e animou a seguir traballando para manter viva a aportación da comunidade galega no deporte uruguaio, así como no fortalecemento da lingua, da cultura e da fraternidade entre Galicia e Uruguai.