A Consellería de Política Social oferta unha segunda edición do Plan de Formación da Dirección Xeral de Xuventude, Participación e Voluntariado que ten como obxectivo ofrecer opcións de formación en materia de educación non formal e de voluntariado no segundo semestre deste ano.

O Plan está conformado por 27 cursos, dos cales 22 son en liña cun total de 1.480 prazas e que se atopan orientadas en dous ámbitos, os cursos dirixidos a persoas voluntarias e entidades inscritas no Rexistro de Acción Voluntaria de Galicia, así como os cursos destinados a profesionais do eido do tempo libre e persoas mozas en xeral.

A programación realízase en colaboración con profesionais de ambos os dous sectores, con especial implicación neste caso das Escolas de Tempo Libre.

Os cursos están orientados á formación especializada e específica en materia de voluntariado nas seguintes áreas: perfeccionamento (que complementa ao básico ofertado no primeiro trimestre) e competencias adquiridas en materia de voluntariado, lingua de signos, formación en igualdade para prevención e afrontamento da violencia de xénero, voluntariado corporativo ou mesmo voluntariado dende os centros educativos. En canto ao ámbito da xuventude, as accións formativas céntranse no eido dixital, a comunicación, o márketing, a preparación para o ámbito laboral, o eido educativo, o tempo libre e as técnicas de mellora emocional.

O prazo para inscribirse nos cursos de voluntariado comezou onte, venres 16 de outubro, e permanecerá aberto ata cubrir as prazas ofertadas. As e os interesados teñen que ser maiores de 16 anos. 
Os cursos son os seguintes:

• A acción voluntaria en situacións de emerxencia derivadas da COVID-19.
• Formación en igualdade para a prevención e o afrontamento da violencia de xénero.
• Lingua de signos nivel básico.
• As competencias do voluntariado: un valor á alza.
• Curso dixital RSE e voluntariado corporativo.
• Educación e voluntariado ambiental.
• Curso de voluntariado. Nivel de especialización de carácter xenérico.
• O voluntariado dende os centros educativos.

En canto aos cursos destinados a profesionais do eido do tempo libre e persoas mozas en xeral (entre 16 e 35 anos), o prazo de inscrición ábrese o próximo 20 de outubro e permanecerá aberto ata cubrir as prazas ofertadas. 

Neste caso, os cursos ofertados son os seguintes:

• Scape Room educativo, propostas analóxicas e dixitais.
• Xestión do estrés.
• O móbil como aliado ante a COVID-19
• Sensibiliza-T contra as violencias
• Como elaborar un currículum
• Claves para triunfar en Tik Tok
• Ocio inclusivo
• Curso de creación e edición de vídeos
• Márketing cultural, creación, posicionamiento e optimización web
• Novas tecnoloxías e Ocio durante o confinamento e a desescalada en persoas con discapacidade intelectual
• Xogos e dinámicas de grupo adaptados á COVID-19
• Os campamentos como espazos de participación: ferramentas e debates
• Educación emocional en tempos da COVID-19
• Iniciación ao acompañamento educativo nos esports e o ocio dixital

As e os interesados que xa foran alumnos con anterioridade poden matricularse a través da ligazón ao panel de alumno/a. No caso de novos alumnos/as, deberán cubrir a ficha dun dos cursos no que se desexe matricular e seguir os pasos da ligazón ao apartado de formación. Finalmente, aquelas e aqueles que queiran seguir un curso que se desenvolve en plataformas externas, deberá cubrir a ficha correspondente. 

A oferta completa de cursos e información pode consultarse no seguinte enlace:  https://tinyurl.com/yxkd8orc