Artigo de Plácido Lizancos publicado na Revista Internacional de Estudios Migratorios - RIEM do Centro de Investigación para el Estudio de las Migraciones y las Relaciones Interculturales. Galicia é un dos territorios do Estado Español que ten presentando tradicionalmente unha das súas maiores taxas migratorias. Conseguir levantar unha casa propia, moderna e funcional, que ofrecese unhas condicións de habitabilidade mellores ás da vivenda tradicional foi un dos motivos que provocaron as migracións que no último século se rexistraron en Galicia, polo que o proxecto arquitectónico adoita formar parte do propio proxecto migratorio das familias. Como non podía ser doutra maneira, a casa que levantan as xentes emigradas presenta unhas características que a diferencian das dos outros cidadáns e cidadás. Sendo a ruptura respecto á vivenda tradicional a característica que aparentemente a fai diferente, isto impactou na opinión pública e na profesional. Neste artigo recóllense os resultados dunha investigación que analiza o proceso de creación da casa da persoa emigrada, identificando de entre as partes dese proceso aquelas que ocasionan o referido impacto e propoñendo maneiras de xestionalo.