O conselleiro de Emprego, Comercio e Emigración, José González, salientou hoxe o valor de iniciativas como os Premios Alecrín na difusión da cultura e tradicións galegas e no reforzo dos lazos coa colectividade galega en Cataluña. Así o sinalou no acto de entrega destes recoñecementos, impulsados pola Federación de Entidades Galegas de Cataluña (Fegalcat) e que poñen en valor a traxectoria de persoas e entidades de diferentes ámbitos a prol da idiosincrasia galega.

Nesta cita -celebrada no auditorio da antiga azucreira de Portas e na que tamén participou o secretario xeral da Lingua, Valentín García- o conselleiro felicitou as persoas e entidades premiadas, vinculadas a ámbitos como a música, as artes, a innovación, a comunicación, a promoción da lingua e da cultura, o deporte, a gastronomía ou a emigración. Ademais, destacou o seu papel como embaixadores de Galicia nos seus respectivos campos. En concreto, o conselleiro foi o encargado de entregar o premio Alecrín na categoría de deporte, que recaeu no presidente da Real Federación Española de Fútbol, Rafael Louzán.

José González tamén recoñeceu o labor de Fegalcat, unha entidade fundada en 1987 para promover a cultura galega en Cataluña e que impulsa distintas actividades culturais ao longo do ano, entre elas estes premios, que xa contan con máis de 15 anos de traxectoria. Neste sentido, salientou a débeda de Galicia coa colectividade galega do exterior e trasladou o apoio da Xunta ás iniciativas das entidades galegas como Fegalcat.

Lembrou tamén o compromiso do Executivo autonómico con aquelas persoas que desexen retornar a Galicia, a través de varias medidas de apoio ao emprego, ao emprendemento e de acceso a vivenda enmarcadas na Estratexia Galicia Retorna 2023-2026.

Pola súa banda, o secretario xeral da Lingua, Valentín García, celebrou a elección, para a edición deste ano, do municipio pontevedrés de Portas, por ser o concello do “ilustre veciño” Domingo Fontán, “sabio, matemático, científico, político e filósofo, soterrado no Panteón dos Galegos Ilustres, quen dedicou 17 anos da súa vida á elaboración da Carta Xeométrica de Galicia, o primeiro mapa cartográfico realizado en España con rigor científico ao basearse en medicións matemáticas”, salientou.