O conselleiro de Emprego, Comercio e Emigración, José González, participa hoxe representando a Galicia no foro internacional El futuro de la migración laboral y la movilidad de talento en América Latina, organizado polo Goberno do Ecuador e o Banco Mundial e que reúne hoxe en Quito a responsables institucionais, organismos multilaterais e expertos de España, Europa e América Latina para abordar os retos e oportunidades da mobilidade laboral, a formación en orixe e a atracción de talento.

Concretamente, José González participou no panel Política migratoria e formación profesional, leccións aprendidas para unha mobilidade laboral regulada, xunto a responsables gubernamentais de Colombia, República Dominicana e Ecuador. Ademais, ao final da xornada, formará parte da mesa redonda Quito 2026: hacia una agenda global para la humanidad, na que se definirán as prioridades de acción rexional.

No marco da súa primeira intervención, o conselleiro expuxo as claves do modelo galego de atracción de talento exterior, unha folla de ruta pioneira en España e articulada arredor de dous eixes: un primeiro foco no retorno da diáspora galega e un segundo na captación de profesionais de terceiros países, con especial atención a América Latina. Un modelo que, segundo avanzou, resulta esencial para dar resposta aos retos demográficos da Comunidade e ás necesidades de man de obra cualificada dos sectores estratéxicos galegos.

González afondou tamén nos principios que sustentan esta estratexia, baseada nunha migración controlada, segura e eficaz, plenamente aliñada coa demanda real das empresas e cunha integración socio laboral que beneficie ao conxunto da Comunidade. Nese sentido, puxo en valor a importancia de que Galicia poida asumir canto antes as competencias de xestión das autorizacións iniciais de traballo, xa solicitadas ao Estado, claves para potenciar este plan e tamén para exercer con plenitude  as políticas activas de emprego en relación coa poboación migrante, máxime ante o escenario de regularización extraordinaria anunciado polo Goberno central.

No ámbito da cooperación con terceiros países e en base ao modelo que promove a Xunta, o conselleiro destacou pasos xa dados nos que se seguirá afondando como os manifestos de vontades asinados con Ecuador, Colombia, Honduras e Paraguai, que permiten establecer un procedemento tutelado desde a orixe no que participan as administracións dos países implicados e as empresas galegas con necesidades de contratación, garantindo procesos ordenados, transparentes e centrados no beneficio das persoas.