A Xunta colaborará con 36 entidades para poñer en marcha programas para mulleres en situación de especial vulnerabilidade, entre as que inclúe especificamente as emigrantes retornadas
O Diario Oficial de Galicia publicou este luns a resolución desta convocatoria de axudas destinada a entidades de iniciativa social sen ánimo de lucro.
O orzamento ascende a preto de 910.000 euros.
Financiaranse programas de atención integral que inclúan servizos de orientación, atención psicolóxica ou asesoramento xurídico.
O Diario Oficial de Galicia vén de publicar a resolución da convocatoria de axudas a entidades de iniciativa social sen ánimo de lucro para que desenvolvan programas integrais de atención dirixidos a mulleres en situación de especial vulnerabilidade, entre as que a Xunta inclúe especificamente as emigrantes retornadas. En total, nesta convocatoria resultaron beneficiarias un total de 36 entidades.
O orzamento para este ano ascende a preto de 910.000 euros, cofinanciados polo Fondo Social Europeo.
Os programas que se financiarán ao abeiro destas axudas teñen como obxectivo fomentar a igualdade de oportunidades para contribuír a reducir a dobre discriminación en que se atopan as mulleres en situación de especial vulnerabilidade, e para dotalas dunha maior autonomía e independencia co fin de mellorar a súa situación persoal, social e persoal.
Teñen a consideración de mulleres en situación de especial vulnerabilidade, ademais das emigrantes retornadas, as vítimas de violencia de xénero; inmigrantes ou refuxiadas; pertencentes a minorías étnicas; dependentes do consumo de substancia tóxicas; perceptoras de rendas de integración, subsidios ou prestacións; reclusas ou ex-reclusas; transexuais ou con conflitos de identidade de sexo; con discapacidade ou enfermidade mental; maiores ou viúvas; sen fogar; ou desempregadas de longa duración.
Os programas que se financian poden ser de dous tipos: de recursos integrais específicos para mulleres xestantes ou lactantes con fillas ou fillos menores de 3 anos e en situación de especial vulnerabilidade; e de atención especializada a mulleres en situación de especial vulnerabilidade, pertencentes a un ou varios colectivos.
Estas actuacións inclúen, entre outros recursos, servizos de orientación e información, atención psicolóxica, asesoramento xurídico, mediación intercultural e/ou familiar, apoio e orientación laboral, ou actividades para adquisición de habilidades persoais e sociais básicas.
Novas relacionadas