O presidente da Xunta de Galicia, Alfonso Rueda, agradeceu hoxe á Lexislatura da Cidade Autónoma de Buenos Aires o seu recoñecemento como visitante ilustre e lembrou que os galegos e galegas teñen “unha débeda eterna de gratitude” coa capital arxentina. 

Durante a súa intervención, Rueda subliñou a “irmandade” existente entre A Arxentina e Galicia desde hai décadas e fixo especial fincapé na excelente acollida que este país americano realizou ás galegas e galegos que emigraron ao longo do século XX. Neste sentido, o titular da Xunta resaltou que a Galicia actual, unha Galicia “de liberdade, de benestar, de progreso económico e de oportunidades” non sería posible sen a pegada que cidades como Buenos Aires deixaron nesas e neses galegos.  

Rueda resaltou ademais que as relacións mantéñense agora grazas ao labor da Delegación da Xunta na Arxentina ou con iniciativas para promover o retorno de galegas e galegos no exterior para que melloren a súa formación ou aposten polo emprendemento en Galicia.