O secretario xeral da Emigración da Xunta, Antonio Rodríguez Miranda, está seguro de que en ningunha outra parte de España se produce un fenómeno que liga a Galicia e é que aquelas persoas que "saen ao exterior" seguen aguantando cunha gran forza e tesón o apego pola súa terra natal.

"Ninguén mantén os vínculos como os galegos. Non sabería dicir a razón, pero o que si podo garantir é que é unha realidade, por tanto, no futuro a Galicia exterior vai ter que seguir achegando moitísimo, e vai facelo porque ten potencialidade, está claro", garante nunha entrevista con Efe na que encomia o papel dos centros galegos, que "son auténticos faros culturais que temos no mundo", cunha enorme faceta social que non é do todo coñecida, especifica.

E insiste en que o futuro da Comunidade galega "vai ser moito máis prometedor e brillante na medida en que sexamos capaces, precisamente, de seguir mantendo o contacto e de continuar aproveitando a presenza de galegos nun mundo globalizado, desa xente que mantén unha vinculación especial, por encima de calquera outra".

"Esa Galicia moderna da que todos estamos orgullosos, e presumimos dela, en calquera país do mundo é un referente positivo e de modernidade, grazas a toda esa xente", agrega, e por iso non é baladí o feito de que nos orzamentos do seu negociado para 2017 as bolsas de excelencia para a mocidade no exterior sexan a principal novidade e absorban practicamente toda a subida da contía asignada á Secretaría.

Rodríguez Miranda profunda na idea de que das e dos 500.000 galegos do exterior, o 70% xa naceron fóra, non en Galicia, por tanto non son emigrantes galegos, e "para nós, esas segundas, terceiras xeracións, xa nadas no exterior, son un recurso moi importante, unha potencialidade que Galicia ten, moi relevante".

Con estas axudas, o que se pretende é que aquelas e aqueles que tiveron que saír recentemente de Galicia, inclusive, e esoutros e outras que xa naceron fóra e queren asentarse na Comunidade galega, pois poidan completar a súa formación a través de estudos de posgrao, coa vista posta en sectores produtivos cunha maior demanda laboral, e teñan, á parte, á súa disposición, un segundo "momento de acompañamento" no sentido de favorecer as súas prácticas ou incorporación a empresas, por conta allea ou por si mesmos "tendo axuda para esa iniciativa empresarial".

De novo neste aspecto cobra importancia o sector agrogandeiro coa idea de "dirixir poboación cara ao rural galego", algo clave desde o punto de vista da demografía e do poboacional, acentúa Miranda.

"Galicia necesita favorecer esa incorporación de familias novas e imos tirar dun recurso propio que temos no exterior", di o secretario xeral. Con iso, preténdese dar cumprimento ao esgrimido polo presidente da Xunta, Alberto Núñez Feijóo, no seu discurso de investidura, cando aludiu a que unha das metas fundamentais desta lexislatura será o fomento do retorno e, dentro das liñas nas que se traballa para iso, tamén está o "retorno emprendedor", que xa estivo funcionando, e ao que agora se suma a captación de "expedientes bos, brillantes, que queiran volver, establecerse, desenvolver aquí a súa vida, establecer as súas familias ou crealas".

Tamén hai outro programa, "Conecta con Galicia", co que se procura que non se perda o vínculo. Céntrase este plan nas e os adolescentes e mozos e mozas que teñen a opción de facer o Camiño e de participar en numerosas actividades, que os conectan co rural e co mar, en relación permanente con outras mozas e mozos galegos.

"Xéranse lazos, a través das redes sociais, e está igualmente o plus engadido de que o que fan, están a divulgalo. E os seus amigos de fóra de Galicia non son galegos, o groso polo menos, co que lle están falando ao mundo do que están a vivir en Galicia e iso é proxección exterior", ao que se suma o feito de que elas e eles mesmos poden decidir co tempo vivir en Galicia.

E, entre quen está fóra, a situación dos galegos e galegas residentes nalgúns países é motivo de especial atención, sobre todo Venezuela, argüe Miranda, posto que hai "un retorno maior de persoas" desde alí e, por tanto, no presente, "o país prioritario en canto a preocupación e atención é sen dúbida Venezuela", con especial fincapé nas prestacións de autoemprego e de tipo asistencial.

En referencia a esta última cuestión en xeral, mantense unha cooperación moi activa para atender situacións de necesidades, ben de forma directa, con axudas económicas individuais, ou a través de entidades ás que se lle fai unha achega, e que son "os nosos ollos e as nosas mans", conclúe.