Pilar Rojo reafirma en Bruxelas a vocación europea da cultura galega, “que non pode nin debe permanecer pechada en si mesma”

Inaugurou, na sede do Comité das Rexións, a exposición itinerante “51 páxinas das nosas letras” organizada polo Parlamento de Galicia, coa colaboración da Real Academia e a Xunta, coincidindo coa Presidencia galega da CALRE.

“Galicia, cunha historia, unha cultura e unha lingua propias é, pese á súa condición periférica, un dos territorios máis concienciados coa idea de Europa”, subliña a titular do lexislativo galego.

  • Rojo, Lebrun e o escultor Manuel Ferreiro Badía durante o acto de inauguración da exposición na sede do Comité das Rexións
    Rojo, Lebrun e o escultor Manuel Ferreiro Badía durante o acto de inauguración da exposición na sede do Comité das Rexións
  • A mostra itinerante “51 páxinas das nosas letras” está organizada polo Parlamento de Galicia, coa colaboración da Real Academia e a Xunta
    A mostra itinerante “51 páxinas das nosas letras” está organizada polo Parlamento de Galicia, coa colaboración da Real Academia e a Xunta
Listen to this page using ReadSpeaker
Bruxelas, 18 de setembro de 2014.

A sede do Comité das Rexións, en Bruxelas, acolle desde este xoves a mostra itinerante 51 páxinas das nosas letras, organizada polo Parlamento de Galicia, coa colaboración da Real Academia e a Xunta para divulgar as autoras e os autores homenaxeados durante os primeiros 50 anos de celebración do Día das Letras Galegas.

A presidenta do Parlamento de Galicia, Pilar Rojo Noguera, foi a encargada de inaugurar a mostra, xunto ao presidente do Comité das Rexións, Michel Lebrun, nun acto no que a titular do lexislativo galego reafirmou a vocación europea da cultura galega.

Citando a autores como Risco, Otero Pedrayo, Cuevillas, Castelao ou Cunqueiro, a presidenta do Parlamento de Galicia sinalou que estes e outras e outros escritores “foron capaces de percibir con claridade que as diferentes dimensións dunha cultura poliédrica como a galega son perfectamente compatibles entre si, dado que non pode nin debe permanecer pechada en si mesma”.

Conciencia europea
Recordou Rojo Noguera que Galicia, “cunha historia, unha cultura e unha lingua propias, é, pese á súa condición periférica, un dos territorios máis concienciados coa idea de Europa”. 

Apuntou nesta liña, que “a nosa condición de meta do Camiño de Santiago permitiunos cultivar unha relación fluída e permanente  cos pobos e culturas de Europa” e que pola Ruta Xacobea, desde os tempos de Carlomagno, canda millóns de peregrinos e peregrinas tamén circulan as ideas, a arte ou a literatura.

“A dimensión atlántica de Galicia non logrou neutralizar o interese dos nosos intelectuais pola cultura europea. Un interese acentuado a finais do século XIX e que se manifesta abertamente a principios do século XX a través da Xeración Nós, o espírito europeísta e europeizante  dos cales  quedou patente nalgunha das páxinas que deixaron escritas”, agregou a titular  do lexislativo autonómico.

Colaboración do CdR e a Fundación Galicia-Europa
Pilar Rojo agradeceu a colaboración prestada polo Comité das Rexións e pola Fundación Galicia-Europa para amosar esta exposición na cidade que acolle as sedes das institucións comunitarias, coincidindo co ano no que o Parlamento de Galicia exerce a Presidencia da Conferencia de Asembleas Lexislativas Rexionais de Europa (CALRE). O acto inaugural contou coa asistencia da vicepresidenta segunda do Parlamento de Galicia, Maria Soledad Soneira.

1099 lecturas