Unha ofrenda floral nos panteóns de Ferrol e Ortigueira pon fin á visita institucional de Mato e Miranda á Habana

A conselleira de Traballo e Benestar, Beatriz Mato, e o secretario xeral da Emigración, Antonio Rodríguez Miranda, visitaron tamén a Asociación Naturais de Ortigueira, Sociedad Española de Beneficencia y Protección Mutua, onde mantiveron un encontro coa súa directiva.

Durante a súa visita de tres días á Habana, os responsables autonómicos exportaron o modelo do cooperativismo galego na illa caribeña, estableceron acordos en materia sociosanitaria e apoiaron á mocidade cubana no ‘I Encontro de mozos e mozas españois descendentes de galegos’.

  • Na imaxe, Mato e Miranda durante á ofrenda floral  nos panteóns de Ferrol e Ortigueira do cemiterio Colón
    Na imaxe, Mato e Miranda durante á ofrenda floral nos panteóns de Ferrol e Ortigueira do cemiterio Colón
  • A conselleira e o secretario xeral mantiveron unha xuntanza coa directiva de Naturales de Ortigueira
    A conselleira e o secretario xeral mantiveron unha xuntanza coa directiva de Naturales de Ortigueira
  • Mato e Miranda entregaron os premios do campionato de fútbol das sociedades españolas en Cuba
    Mato e Miranda entregaron os premios do campionato de fútbol das sociedades españolas en Cuba
Listen to this page using ReadSpeaker
A Habana (Cuba), 9 de xuño de 2014.

A conselleira de Traballo e Benestar, Beatriz Mato, e o secretario xeral da Emigración, Antonio Rodríguez Miranda, remataron a súa visita institucional á Habana cunha ofrenda floral nos panteóns de Ferrol e Ortigueira do cemiterio Colón.

Así mesmo, Mato e Miranda visitaron a Asociación Naturales de Ortigueira, Sociedad Española de Beneficencia y Protección Mutua, onde mantiveron un encontro coa súa directiva para analizar as súas principais actuacións en materia de atención social. Por último, a e o representante galegos entregaron os premios do campionato de fútbol das sociedades españolas en Cuba.

Ambos responsables autonómicos desprazáronse estes tres días á Habana co fin de exportar o modelo do cooperativismo galego á illa caribeña, establecer acordos en materia sociosanitaria e para apoiar á mocidade cubana no ‘I Encontro de mozos e mozas españois descendentes de galegos’.

O venres, ambos os dous membros do Goberno galego deron a coñecer as políticas que desde a Xunta se impulsaron nos últimos anos para fomentar esta fórmula empresarial, que está a demostrar que é resistente fronte á crise.

Así mesmo, a e o responsable da Xunta de Galicia reuníronse coa viceministra de colaboración internacional do Ministerio de Saúde, Marcia Cobas, coa que estudaron as posibles liñas de colaboración en materia sociosanitaria para as e os galegos e descendentes de persoas galegas residentes en Cuba.

A axenda oficial da conselleira de Traballo e Benestar e do secretario xeral de Emigración completouse cun encontro coa directora de cooperación internacional da Oficina do historiador da Habana, Nelys García Blanco, que tivo como obxectivo abordar a posibilidade de abrir vías de colaboración.

Xa o sábado, asinouse un convenio de colaboración coa Sociedade de Protección e Recreo Monterroso e Antas de Ulla e a Federación de Sociedades Galegas de Cuba para a construción dun centro de día.

Doutra banda, Mato e Miranda, acompañados do embaixador de España en Cuba, Juan Francisco Montalbán, inauguraron o ‘I Encontro de mozos e mozas españois descendentes de galegos’s, onde animaron á mocidade galega en Cuba a emprender e comprometéronse a impulsar proxectos xuvenís entre Cuba e Galicia. A visita á Habana rematou o sábado no Centro galego da Habana, onde a e o mandatario galegos inauguraron a mostra fotográfica Nós Mesmos. Asociacionismo galego na emigración.

965 lecturas