O especial Historias de ida e volta, un proxecto web realizado polo Consello da Cultura Galega (CCG) en colaboración coa Secretaría Xeral da Emigración, chega a xullo documentando a acción filantrópica de Blanco de Lema.

O novo especial de Historias de ida e volta, proxecto do Arquivo da Emigración Galega (AEG) do Consello da Cultura Galega (CCG) que conta co apoio da Secretaría Xeral da Emigración, amosa en vinte imaxes e documentos  a acción filantrópica do indiano Fernando Blanco de Lema (Cee, 1796- A Habana, 1875).  A construción de varias escolas, un novidoso plan educativo, a apertura dunha farmacia con medicamentos subvencionados ou a instalación da luz eléctrica son algunhas das accións filantrópicas desenvolvidas por este emigrante na bisbarra fisterrá no século  XIX .

Unha das características máis definitorias da emigración galega é a súa acción filantrópica. A sociedade galega puido progresar grazas á creación de escolas construídas co cartos que enviaban desde os destinos da emigración. Na entrega número 31 do especial Historias de ida e volta cóntase a de Fernando Blanco de Lema, un indiano enriquecido na illa de Cuba que non retornou a Galicia pero que desde o outro lado do Atlántico contribuíu ao seu desenvolvemento económico e social. “O seu legado foi xestionado por unha fundación xestionada por un padroado que materializou os seus desexos” explica o especial. 

Grazas ao seu labor edificáronse dous edificios no que recibiron instrución gratuíta numerosas xeracións de nenos e nenas da comarca de Fisterra. Caracterizáronse por empregar innovadores plans educativos, de clara vocación humanista e científica (tiñan aula de debuxo, de música, de educación física...). Ademais, fomentouse a cultura da bisbarra con cursos de alfabetización para adultos e coa concesión de bolsas para o alumnado máis avantaxado, aulas de música e teatro con actuacións para toda a veciñanza ou a apertura da súa biblioteca e instalacións a toda a poboación. 

Ademais a fundación sufragou numerosas iniciativas de gran calado para o progreso socioeconómico da contorna: dende a realización de campañas de vacinación ou a instalación dunha farmacia con medicamentos subvencionados ata investimentos en obras públicas como a instalación do teléfono e da luz eléctrica na vila (1906), o arranxo de estradas ou a construción dun novo cemiterio.

O especial explica con vinte imaxes e documentos, os diferentes exemplos desta acción filantrópica; así como artigos de publicacións da época que dan conta do mérito desta acción. 

O proxecto Historias de ida e volta
O Consello da Cultura Galega, en colaboración coa Secretaría Xeral da Emigración, mantén o especial Historias de ida e volta para dar a coñecer aqueles materiais que documentan o fenómeno migratorio. En máis de 30 entregas documentáronse os procesos de saída e chegada, a vida social e cultural, etc., para, deste xeito, explicar todo o ciclo migratorio a partir dos materiais que custodia o Arquivo da Emigración Galega.

• Ligazón relacionada: consellodacultura.gal