O Centro Gallego de Avellaneda concedeu esta pasada fin de semana as distincións ‘A Barca de Sálvora’, coas que a institución recoñeceu a destacadas mulleres polo seu aporte e contribución á colectividade galega.  O acto, ao que asistiron preto de 150 persoas, contou coa presenza do delegado da Xunta de Galicia en Bos Aires en funcións, Alejandro López Dobarro, e numerosas e numerosos presidentes e directivos dalgunhas das entidades máis importantes da colectividade. O delegado lembrou que a Xunta leva anos traballando pola promoción da igualdade e que nos últimos tempos puxo en marcha medidas pioneiras para protexer os dereitos das mulleres, das nenas e dos colectivos LGBTI. 

Galicia é unha comunidade comprometida coa construción dunha sociedade máis xusta, inclusiva e igualitaria, onde toda a cidadanía teña cabida e dereito a desenvolver unha vida plena, independentemente da súa orixe, xénero e orientación sexual. Un lugar seguro, onde todas as mulleres e nenas poidan vivir en liberdade.

A distinción ‘A Barca de Sálvora’ lembra a memoria de Cipriana, Josefa e María, máis coñecidas como ‘as heroínas de Sálvora’, por teren participado no rescate de decenas de náufragas e náufragos do buque Santa Isabel que afundiu preto das costas de Ribeira en 1921

Nesta sexta edición, as mulleres recoñecidas foron: Alicia Carasa polo Centro Gallego de Avellaneda; Carmen Varela Suárez pola Asociación Civil Fillos do Porto do Son e Graciela Liliana García pola Sociedad Parroquial de Vedra.

Unha edición que contou coa conselleira de Política Social, Fabiola García, como madriña do evento.