Na súa sede na capital tinerfeña, o Centro Galego de Tenerife celebrou o Día das Letras Galegas 2021 lembrando, ademais de a Xela Arias, a quen a Real Academia Galega acordou dedicar a presente edición da gran festa da nosa cultura, a Ricardo Carvalho Calero, o homenaxeado pola Academia o pasado ano, xa que en 2020 a entidade non puido realizar este evento polas normas sanitarias vixentes a causa da pandemia da covid-19.

As e os asistentes ao acto, no que se respectaron os debidos protocolos sanitarios, puideron coñecer a biografía de ambos, de quen se leron textos e poemas, e tamén se proxectou unha gravación audiovisual con todas as autoras e autores homenaxeados de 1963 a 2021. Así mesmo, aproveitouse para celebrar a reapertura das actividades 2021 do Centro Galego. Para rematar, houbo un aperitivo de produtos galegos, cunha queimada co seu conxuro, e a interpretación do himno galego.

Fonte e foto: Centro Galego de Santa Cruz de Tenerife