No seu local social do barrio de Pardinyes da capital da Segrià, este pasado domingo, 27 de xaneiro, o Centro Galego de Lleida (Casa de Galicia) deu comezo ás súas actividades de 2019 coa celebración da súa xa tradicional Festa da matanza do porco.

O evento reuniu a un numeroso grupo de socias e socios da entidade, que estiveron acompañados dunha numerosa representación institucional entre quen se atopaba o alcalde de Lleida, Félix Larrosa Piquè; as e os concelleiros do Concello de Lleida Antoni Postius Terrado, Dolors López Aguilar, Rafael Peris Martín e Francesc Josep Cerdá Esteve; o subdelegado de Defensa en Lleida, cnel. D.E.M. Fernando Rodríguez de Rávena; o presidente dos “Armats de Lleida”, José Ángel Comes i Serret; e o presidente da Federación de Casas e Centros Rexionais de Lleida, Cosme García i Mir. Grazas ao traballo do socio Xosé Domínguez e ás e aos membros da Xunta directiva que lle axudaron, todas e todos os comensais puideron degustar un xantar baseado nos produtos derivados do porco, rematando coa clásica queimada.

Fonte e fotos: Centro Galego de Lleida