Miranda sinala o papel fundamental das comunidades galegas na proxección exterior da alta calidade dos produtos agroalimentarios de Galicia
O secretario xeral da Emigración reuniuse con parte da comunidade galega en Cuxhaven, cunha forte representación da comarca de Arousa.
O secretario xeral da Emigración, Antonio Rodríguez Miranda, puxo o foco no papel que a gastronomía galega xoga na proxección exterior de Galicia como unha das ferramentas con máis alcance e pegada en todos os colectivos de cidadás e cidadáns galegos residentes fóra das nosas fronteiras. O responsable autonómico, quen lembrou que a promoción dos produtos agroalimentarios de Galicia conforma unha das cen medidas incluídas na Estratexia Emigración 2020, mantivo un encontro con varias e varios representantes da comunidade en Cuxhaven.
As e os directivos e socias e socios do Centro Galego desta cidade alemá acudiron á sede da Secretaría Xeral da Emigración, en Santiago de Compostela, acompañados por responsables da Mancomunidade do Salnés. Así, xunto á presidenta da entidade galega de Cuxhaven, Marisa Sotelo, o presidente e o xerente do órgano comarcal, Gonzalo Durán e Ramón García Guinarte, respectivamente, arrouparon ás e aos membros da entidade alemá na exposición dos seus proxectos a Miranda, quen ofreceu a súa colaboración nas actividades de proxección de Galicia no exterior que están a deseñar desde conxuntamente con esta localidade de Alemaña. A cidade está irmandada, de feito, co concello arousán de Vilanova desde 2001.
O albariño, embaixador de Galicia
A celebración da Festa do Albariño en Cuxhaven converterase a terceira semana de setembro (do 19 ao 23) nunha cita obrigada para as e os residentes nesta zona do país xermano, e nunha nova iniciativa do Centro Galego, que “desde 1980 mantén o firme e decidido compromiso de difundir a orixe e identidade galegas, desenvolvendo actividades de divulgación da idiosincrasia, a cultura e os costumes galegos entre os nosos socios, os seus descendentes e o público en xeral”, segundo a propia entidade.
Novas relacionadas