O secretario xeral da Emigración, Antonio Rodríguez Miranda, reuniuse co presidente da Sociedade de Socorros Mútuos e Beneficente Rosalía de Castro de Santos, Casto Vieitez Fernández, para analizar a situación e necesidades da comunidade española que reside no Brasil, onde tamén vive unha importante colectividade de galegas e galegos, preto de 50.000, sendo o segundo país do continente americano onde máis cidadás e cidadáns galegos residen, trala Arxentina. 

Rodríguez Miranda e Vieitez Fernández destacaron a recente firma dun acordo de colaboración a través do que a Secretaría Xeral da Emigración destina 12.000 euros a esta entidade para a axuda na atención socioasistencial e sanitaria básica ás persoas galegas maiores ou descendentes residentes en Santos, Brasil, que, por razóns de carencia ou dependencia, se atopen nunha situación de necesidade e non poidan afrontar os custos. 

A Sociedade de Socorros Mútuos e Beneficente Rosalía de Castro de Santos é unha entidade sen ánimo de lucro que ten como finalidade desenvolver unha política orientada a mellorar a asistencia social desinteresada das persoas da terceira idade necesitadas pertencentes á colectividade galega, atendendo de xeito permanente a preto dunha vintena de galegas e galegos.