Miranda renova en Cuba o compromiso de Galicia e o seu goberno coas segundas xeracións de galegas e galegos na illa

O secretario xeral da Emigración participou en encontros de traballo na Habana, onde lembrou as axudas individuais que o seu departamento convoca para galegas e galegos da diáspora en situacións de vulnerabilidade.

Na foto, Miranda coa mocidade no interior do Centro Galego da Habana
Na foto, Miranda coa mocidade no interior do Centro Galego da Habana
Listen to this page using ReadSpeaker
Santiago de Compostela, 22 de febreiro de 2016.

O secretario xeral da Emigración, Antonio Rodríguez Miranda, rematou o sábado a súa viaxe a Cuba, durante a que mantivo un novo encontro coa mocidade vinculada á diáspora galega, segundas e terceiras xeracións de galegas e galegos que -malia non ter pisado na inmensa maioría dos casos a terra de orixe das e dos seus proxenitores e avós e avoas- manteñen viva a chama da Galeguidade na illa, con fortes vínculos persoais e culturais.

Así, no encontro organizado pola Federación de Sociedades Galegas de Cuba, que preside Sergio Toledo, o secretario xeral da Emigración instou á mocidade galega na illa a manter e intensificar esas relacións entre ambas beiras do océano, “agora que o mundo cambia a  velocidade crecente, e todo indica que se incrementarán de xeito moi notable as relacións exteriores de Cuba”.

Miranda destacou o pulo que ás iniciativas dos mozos e mozas se dá desde as asociacións de galegas e galegos presentes na illa e instounos a seguir traballando conxuntamente, “nun labor común que apoiamos e seguiremos apoiando desde o Goberno galego”, afirmou. O máximo responsable autonómico en materia de Emigración tamén se comprometeu “a estudar o desenvolvemento de novas iniciativas en materia de formación para a mocidade galega en Cuba, iniciativas que se instrumentarán sempre en función das súas propias propostas”.

“Queremos axudar a formar á mocidade vinculada a Galicia, para que estea perfectamente adaptada aos novos tempos sociais e económicos que se aveciñan en Cuba, de maneira que podan seguir axudando á prosperidade do seu país”, sinalou o secretario xeral.

Apoio pioneiro
Lembrou Rodríguez Miranda o apoio pioneiro que o presidente Fraga fixo chegar ás e aos residentes galegos, e a todo o pobo cubano, nun país que daquela sufría o bloqueo internacional: “Se en tempos de peores condicións nas relacións bilaterais, Galicia tivo sempre presente a Cuba, aos galegos de Cuba pero tamén a todo o pobo cubano, levouna no corazón, e apoiou o seu desenvolvemento en todo o posible, con máis razón o fará agora que se presentan novas oportunidades para fortalecer esas estreitas e permanentes ligazóns entre os noso pobos”.

Ligazóns que tiveron pegada na historia e símbolos oficiais de Galicia (estrea do himno na Habana, ou bandeira inspirada na proa dos paquebotes que arribaban ao seu porto cos primeiros emigrantes galegos e galegas), pero sobre todo en centos de milleiros de familias residentes naquela República, como o demostra a presenza permanente de apelidos galegos en calquera listaxe cubana, e mesmo nos rueiros de vilas e cidades.

Axudas a individuos e comunidades
Ademais do encontro coa mocidade, a axenda de Miranda na capital cubana completouse cun encontro de traballo co embaixador de España na illa, Francisco Montalbán, e tamén cos presidentes e presidentas das entidades galegas na capital cubana. Con elas e eles analizou a actualidade da nosa diáspora, e os emprazou a traballar arreo en favor desa unidade das colectividades galegas, e do mantemento e fortalecemento do compromiso das segundas e terceiras xeracións coa terra de orixe das e dos seus antepasados.

Igualmente, Miranda lembrou que o departamento que dirixe convoca cada ano unha serie de axudas para o mantemento e mellora das comunidades galegas do Exterior e as súas infraestruturas e actividades, dotadas neste ano cun total de 1’6 millóns de euros, cun importante aumento do 11’11% nos fondos destinados aos programas de apoio infraestrutural e adquisición de equipamentos.

Pero no que máis incidiu o secretario xeral da Emigración foi en lembrar que para os cidadáns e cidadás individuais existe unha liña de axudas individuais para persoas en situacións de vulnerabilidade que supón a maior partida orzamentaria da Secretaría Xeral da Emigración (2’1 millóns de euros, cen mil máis ca o ano pasado), grazas á cal 8.000 familias da diáspora en situación difícil poden manter ou mellorar a súa calidade de vida.

Precisamente, Cuba é o país no que residen o maior número de persoas beneficiarias destas axudas. Na súa xuntanza coas e cos presidentes, Miranda pediu a súa colaboración para que as entidades galegas na illa informen sobre estas axudas e as acheguen a tódalas aquelas persoas, potenciais beneficiarias, que residan en puntos afastados da capital.

724 lecturas