Miranda e Alén analizan coas e cos bolseiros BEME o curso de mestrado que están a realizar no campus de Ourense da UVIGO grazas á colaboración da Xunta

O secretario xeral da Emigración mantivo unha reunión xunto ao delegado da Xunta en Ourense coas galegas e galegos universitarios do exterior para coñecer a súa experiencia no campus das Burgas.

O responsable da Secretaría Xeral recordou que mañá venres pecha a nova liña de Bolsas Excelencia Mocidade Exterior.

Rodríguez Miranda volveu a solicitar ao  Goberno central que a homologación dos títulos universitarios das e dos retornados estranxeiros sexa moito máis áxil.

Imaxe do encontro desta mañá en Ourense
Imaxe do encontro desta mañá en Ourense
Listen to this page using ReadSpeaker
Ourense, 29 de abril de 2021.

O secretario xeral da Emigración, Antonio Rodríguez Miranda, mantivo esta mañá, no Espazo Xove da Delegación da Xunta en Ourense, un encontro cos bolseiros  e bolseiras BEME que están a cursar un mestrado no campus da UVIGO nesta cidade acompañado do delegado da Xunta, Gabriel Alén. Á reunión asistiron alumnas e alumnos dos mestrados que imparte o campus da cidade das Burgas, que son galegas e galegos retornados do exterior ou descendentes de cidadás e cidadáns galegos, e que obtiveron en 2020 unha destas axudas de excelencia que outorga a Secretaría Xeral da Emigración para poder ampliar estudos superiores.

Durante o encontro, os alumnos e alumnas trasladáronlle ao secretario xeral as súas impresións sobre os cursos que están a levar a cabo, as problemáticas ás que se enfrontaron ao chegar a Galicia ou as súas inquedanzas por poñer en marcha un negocio ou buscar un emprego para poder quedarse a vivir na nosa comunidade autónoma.

Un dos grandes problemas que trasladaron as bolseiras e bolseiros foi a lentitude coa que se tramita dende o Goberno central a homologación dos títulos universitarios dos seus países de orixe, o que lles afecta para poder buscar un emprego por conta allea en Galicia. Neste senso, Rodríguez Miranda volveu a solicitar ao  Goberno central que a homologación dos títulos universitarios das e dos retornados estranxeiros sexa moito máis áxil

Na actualidade 162 estudantes atópanse realizando un dos 146 mestrados que ofrecen a USC, a UVigo e a UDC, xa que algúns dos matriculados e matriculadas do ano anterior aínda continúan desenvolvendo os seus estudos que constan de 90 créditos.

Tal e como recordou o secretario xeral, nestes intres, e ata mañá, venres 30, mantense aberta a convocatoria para as bolsas do próximo curso, que aumentan das 150 de 2020 ata as 200 para este ano de cara a paliar as dificultades causadas pola pandemia da covid-19.   

O Goberno galego destina 1,72 millóns de euros impulsando a captación dun total de 200 tituladas e titulados universitarios galegos e de currículo brillante, residentes no estranxeiro e cunha titulación de grao, licenciatura, enxeñaría ou arquitectura, que poderán cursar estudos de mestrado nalgunha das tres universidades galegas.

As e os beneficiarios destas bolsas de excelencia son cidadás ou cidadáns galegos por nacemento ou descendentes por consanguinidade, e deben acreditar un mínimo de dous anos de residencia no Exterior e estar admitidos ou admitidas na preinscrición dalgún dos mestrados das universidades galegas.
 
A Xunta impulsa así o retorno de currículos brillantes ao tempo que contribúe á fixación de poboación na Galicia territorial, pasando das 150 bolsas do pasado curso ás 200 para o 2021/22, co fin de axudar no regreso de máis mozas e mozos a Galicia polas dificultades que poidan existir no exterior a consecuencia da covid-19.

A bolsa, cuxo importe é de 7.000 ou 7.650 euros (segundo a persoa beneficiaria proceda de Europa ou do resto do mundo) por curso completo de 60 créditos ECTS, destínase a cubrir os gastos de matrícula, viaxe, aloxamento e manutención na Galicia territorial. Aqueles e aquelas que se matriculen nun curso de maior duración (90 créditos) disporán dun orzamento total de ata 11.475 euros (en función do continente de procedencia do alumnado). 

O obxectivo das BEME é non só atraer cada ano galegas e galegos que viven fóra e que completen aquí a súa formación especializada senón que traballen en Galicia e que fixen tamén no territorio galego definitivamente a súa residencia.

Neste sentido, todas e todos os beneficiarios destas axudas contarán, un ano máis, cunha orientación laboral coa que se pretende non só captar para Galicia o talento máis brillante de entre as mozas e mozos residentes fóra fomentando o retorno da poboación activa laboral, senón tamén facilitarlles o seu establecemento definitivo na comunidade. A oferta céntrase en estudos con capacidade de absorción no tecido produtivo e laboral galego. 

618 lecturas